حارس الأسرار وموديل الإنستجرام1
“حمادة” مش من النوع المهووس بالسوشيال ميديا ولا التاريخ ولا كل الحواديت دي.
بس طبعًا أول ماعرف إن “الميديا” بتجيب فلوس!
عصاية السيلفي واللبس الكاجوال كانو موجدين من الصبح في البيت.
_”حمادة” كان واقف قدام المدخل، لابي نضارة شمس براند وشايل عصاية السيلفي وفاتح لايف وهو بيكلم جهورة اللي قدر يعمله في فترة قصيرة بسبب الإيفهات اللي بيقولها والناس كالعادة بتحبها!
“هاي يافانزي!
بجد الVibeهنا تحفة أوي…
أنا حسيت إني مقصر في حق أجدادي أوي بعد ماشوفت افتتاح المتحف الكبير، فقررت أجي الأهرامات لأول مرة والمرة الجاية المتحف…. أنا دلوقتي قدام خوفو.. أو خفرع.. المهم إنّه واحد فيهم.”
_ حمادة” فضل فاتح لايف وبيفرج الفانز بتاعه على أجدادهم الفراعنة.
عدى من جمبّه عسكري الأمن فوقفه “حمادة” وسأله:
“بقولك ياباشا!
هو فين” أبو الهول”؟ أصله مش باين من الزحمة.
_العسكري رد عليه بملل وهو بيشاور على اتجاه:
حارس الأسرار وموديل الإنستجرام1
“هتلاقيه قاعد هناك مستني نصيبه في اللايف بتاعك، خد يمين في أول دخلة هتلاقيه في وشك.
بس بلاش تلمسه عشان بيزعل.
_ضحك” حمادة” على كلامه وقاله:
“بيزعل! ليه؟… هيندهلي المومياء؟ ههههه.. شكرًا ياريس”
_وصل حمادة عند أبو الهول بعد ماقفل اللايف بس لسه بيصور عشان لمّا يروح ينزلها “ستوري”، وأول ماوصل المكان غجأة بقى هادي جدًا والناس بتختفي تدريجيًا وبيفضل لوحده قدام أبو الهول.
” ياااااه… منظرك في الحقيقة غير الصور خالص، مناخيرك دي يا “هول”؟
محتاجة تتعمل فيلر عشان كبيرة قوي!
يالا مش مهم بقى، ناخد سلفي.
_حمادة بيلف ضهره وبيرفع الموبايل وفجأة بيسمع صوت وراه بيقول:
” طب ماتعملي بورتريه أحسن عشان الودن الشمال باينة كبيرة؟”
_”حمادة” بيطنطط من الخوف والموبايل بيقع منّه.
“يامامي! مين اللي بيتكلم؟ في حد مستخبي ورا الصخرة؟”
“أبو الهول: صخرة في عينك يا اعمى إنت.
أنا اللي بقالي زي 7000آلاف سنة صابر على الحر والشمس والناس اللي بتيحي تقولي” بوسة لأبو الهول”.
_حمادة من كتر اللي بيحصل بيحس أنه اتجنن خلاص ودماغة بتهنج وبيقول:
“إنت.. إنت بتتكلم بتتكلم بجد؟ إنت أبو الهول؟ ده أنا قولت ال Pre_Workoutاللي شربته الصبح مغشوش!
_رد عليه” أبو الهول”وقاله:
“اقعد ياحمادة… اقعد وبلاس توتر، أنا ماكناش ناوي أتكلم، بس استفزتني كلمة” فيلر” ده إحنا اللي علمنا العالم النحت، تيجب إنتَ تقولي مناخيرك محتاجة “فيلر”؟
ده أنا لو قمت، هعمل بيك” كونتور”في الصحراء.
حمادة وأبو الهول صحاب
_حمادة بدأ يهدأ وقعد على حجر أبو الهول وكأنه واحد صاحبة ويعرف من سنين وقال:
“طب والله يا أبو الهول باشا أنت طلعت راجل ذوق..
قولي بقى!
إنت ليه ساكت كل السنين دي؟
مش زهقان؟”
حارس الأسرار وموديل الإنستجرام1
_أبو الهول اتنهد تنهيدة بتطير التراب وقال:
“زهقان؟ ده أنا شوفت بلاوي.. شوفت” نابليون”وهو بيحاول يعمل فيها “روش” ويضرب مناخيري.
وشوفت “محمد علي” وهو بيبني القناطر، بس الجيل بتاعكو ده غريب!
بتيجو هنا عشان تتصور ببوز البطة جنب وشي؟
أنا حارس الأسرار ياابني، مش “موديل” في انستجرام!.
_ردّ عليه “حمادة” وقاله:
“إنت كمان عرفت الإنستجرام يا” هول”؟ ده أنا لسه عارفة أول امبارح! ”
“أبو الهول قاله: لازم بردو يا حمادة نثقف نفسنا، امال ابقى جاهل زيك كده؟”
_ردّ عليه “حمادة” وقال بإستهزاء:
أبو الهول والتطور
“معلش يافنان، التطور بقى، بس قولي؟
هو بجد في كنوز تحت رجلك؟”
_أبو الهول غمز لحمادة وقاله:
“في محفظة وقعت من سائح ألماني سنة 1974،وفي مفتاح عربية 128ضايع من واحد في السبعينات.. هي دي الكنوز اللي عندي.
حارس الأسرار وموديل الإنستجرام1
الكنز الحقيقي اننا لسه واقفين على حيلنا طول السنين دي وبتاخدو فلوس من السياحة على قلبكو قدّ كده!”
_ردّ عليّه “حمادة” وقال:
“ياستير يارب.. طب بمناسبة المتحف الجديد!
مش ناوي تنقل هناك؟
بيقولو السيرامك هناك تحفة والتكيبف شغال.”
“أبو الهول:
أروح في يا أهبل؟
أنا الأساس والباقي شنط وكياس، أنا” السيستم “بتاع المنطقة”.
_حمادة بيضحك بصوت عالي وبيقول:
المصريين والأيفيهات
” طب والله يا جامدة ياض يا “هول” طول عمري بقول إن احنا اللي اخترعنا الايفيهات وشعب مصر ده اكتر شعب دمه خفيف. ”
_ردّ عليّه “أبو الهول” بغرور:
“جدو” أبو الهول”ياحيوان، شايفني عيل بلعب معاك في الشارع؟ ”
_فجأة الرياح بتبدأ تهبّ، وأبو الهول بيبدأ يضحك بصوت عالي.
“أبو الهول: بقولك إي ياحمادة؟
بما إنك أول واحد أفضفض معاه واتكلم، أنا هعمل معاك واجب.. هخليك تشوف الأهرامات وهي لسه بتتبنى!
_حمادة كان هيطنطط من الفرحة وقاله:
” بجد ياهول؟ ق قصدي ياجدو أبو الهول؟ هتركبي آلة زمن زي اللي بنقرء عنها في الروايات؟ ”
ردّ عليّه “أبو الهول” وقال:
“حاجة شبّة كده!
هغمض عيني وأنفخ نفخة واحدة… استعد!”
حمادة وآلة الزمن
_أبو الهول بينفخ نفخة قوية، الدنيا بتسود… وفجأة “حمادة” بيلاقي نفسه وسط آلاف العمال اللي لابسين لبس فرعوني وشايلين حجارة، وبينهجوا.
حمادة كان لابس لبس فرعوني بس لسه بنضارته، بس حواليه وقال:
“إي ده؟
هو جدو هول العجوز عملها بجد ولا أنا في برنامج وهلاقي” رامز جلال”طالع من صخرة دلوقتي؟.”
_واحد من العمال الفرعوني شبّه عسكري الأمن بص لحمادة وقاله:
“خنت آمون”؟ شيل الحجر ده وطلعه للدور الخمسين، الملك” خوفو”متعثب وعايز يخلص الهرم قبل “الويك_إيند.”
الويك أيند في عصر الفراعنة
_حمادة ردّ بزهول من اللي بيحصل وقال:
“ويك إيند؟ وفي عصر الفراعنة؟ وبعدين أنا إسمي” حمادة”مين الراجل اللي بتناديني بإسمه ده!
وبعدين أشبل حجر اي؟ أنا ضهري بيوحعني من قاعدة المكتب، يبقى عاوزني أشيل حجر وزنه 2طن؟ لا وكمان أطلع بيه للدور الخمسين؟
_العامل ردّ عليّه وقاله بلامبالاه:
حارس الأسرار وموديل الإنستجرام1
“والله بقى روح لأبو الهول وشوف الحوار ده معاه.
ماهو اللي بعتك هنا عشان تتعلم الأدب وماتتريقش على مناخيره تاني.”
_فجأة حمادة بيفوق وهو نايم على الرملة، وعسكري الأمن بيرش عليه ميّة.
“العسكري: قوم يا أستاذ… شكلك خدت ضربة شمس وقعدت تخرف وتقول:
” ياخوفو ياكبير.. الحجر تقيل”.
_حمادة قام مفزوع وبينفط في هدومه وقال:
“هو راح فين؟أبو الهول اتكلم.. والله اتكلم!”
_العسكري بيمشي ويسيبه وهو بيقول:
“لاحول ولاقوة اللي بالله، ده اتجنن خالص”.
_حمادة بص لأبو الهول بفزع، لاقاه زي ماهو مابيتحركش، بس هو متأكد إن اللي حصل ده حقيقة وإنه اتكلم وماكنش بيخرف، وبسرعة البرق” حمادة” كان أخدت ديلة في سنانة وجرى وهو بيقول:
هروب حمادة بلا شهرة بلا أهرامات
“أنا مش عاوز متحف، مش عاوز شهرة، مش عاوز اشوف الأهرامات تاني.”
_أول ما “حمادة” طلع يجري، في صوت ضخكة مكتومة جاية من ناحية التمثال أبو الهول “بصوت همس”:
” وابقى سلملي على الFollowersبتوعك ياحمادة. ”
الكاتبة ندى عماد عبداللّٰه “ديلارا”
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
