رحلة البحث عن عريس: المشهد الأول.
فاكرة أول مرة قعدت فيها مع عريس كان جاي مع أمه وكان إسمها عنايات، وكان وقتها جايب معاه علبة كدة شكلها جميل أوي متغلفة ومتزينة اللي يشوفها يقول فيها الخير كله، علبة شكولاته من النوع الفاخر اللي من الآخر ….بعد ما دخلت وسلمت عليهم وقعدت شوي معاه نتعرف على بعض
ماما دخلت تعمل عصير وبابا جاله تليفون فأستأذن خمسة وهو ومامته قاعدين قصادي ..كلمة السر في القعدة كانت نوفر…يقوم ويقعد يقول نوفر.. هنكتفي بدبلة ليكي بس علشان نوفر… هنسكن مع ماما في شقتها الواسعة علشان نوفر … مش هنعمل فرح علشان نوفر ..هنأجر الفستان علشان نوفر … بصراحة إتخنقت منه ..لحد ما طاقتي نفذت لما طل لي كده من فوق لتحت وكأنه بيعاين شقة وقال لي ..أظن إنك محتاجة تخسي شوي… قومت ضحكت بصوت عالي وقولت له:
_ طيب ما تشوف لك واحدة غيري وأهو بالمرة توفر… هو أنت فاكرني كيس برسيل ملك التوفير… في أيه ؟
أنا قولت الجملة دي ولقيت مامته إتحمقت وقامت من مكانها ولا بكيزة هانم الدرامالي وقالت له: يلا يا محمود .. ورايا نخرج من هنا شكل السنيورة ملهاش في الطيب نصيب، قومت ضحكت كمان مرة وأنا بقول لهم.. معلش يا طنط ابقي إدي نصيبي لمحمود وأهو بالمرة يوفر … الفكرة إنهم بعد ما مشيوا بنفتح علبة الشكولاته لقينا فيها إتنين هوهوز من أبو ثلاثة جنيه … تقريبًا كده كان عايز يوفر.
رحلة البحث عن عريس: المشهد الثاني.
الحكاية التانية دي بقى أغرب من الخيال ولا حكايات دكتورة علا عبد الصابور نفسها… جوز خالتي قال لبابا إن فيه واحدة شافتني في فرح أخوه وعايزة تخطبني لإبنها، بابا قال له خلاص ييجي… المهم العريس جه وكان باين عليه أنه شخص تقي وورع من المسبحة اللي ماسكها في إيده وطريقة كلامه الهادية اللي فيها لمسة من الدين كده وإسمه يامن ياااه أخيرًا هتجوز يامن أنقذه من الموت.
يامن كان عريس كده من اللي يسرقوا العقل بكل الكلام اللي إتحكالنا علبه وهنا تنقح عليا الأغنية التراثية العتيقة اللي بتقول: مصدقيش يا عروسة اللي بيقولوا عليه، متصدقيش يا عروسة الحنة باينة في إيديه وحقيقي الأغنية مكذبتش
المهم بابا قال أدخل فدخلت وألقيت السلام ، رد عليا وهو باصص في الأرض، بابا عرفنا على بعض وقعدوا يتكلموا شوي وأنا من أول الحوار ملاحظة أنه كل كام جملة يطل عن شماله شوية وبعدها بكام جملة يطل على يمينه وشوية فوق رأسه في السقف ..قولت يمكن عاجبه دبكور المكان .. خصوصًا إني ببص ناحية بابا مش شيفاه ملاحظ حاجة
لحد ما بابا قرر يقعد قصادنا في الصالون مع جوز خالتي ويسيبنا نتكلم شوي… وأول حاجة سألها لي صدمتني يعني أنا كنت متوقعة يسألني بصلي ولا لأ .. حافظة كام جزء من القرآن الكريم؟ يعني أسئلة من دي، بس ده لقيته طل لي كده وهو بيبحلق وقال لي: أنتِ أسم أمك أيه؟
فكي وقع من الصدمة وأنا بقول له بصوت مزدهل: نعم! دا أيه بقى ده؟ وحضرتك بتسأل عن إسم ماما ليه يعني؟
إبتسم كده ببسمة رضا وميل ودنه ناحية الشمال حبة وكأنه بيسمع حاجة وبعدين إتعدل تاني وقال لي: خلاص عرفت نادية مش كده.. طيب إسم أم أبوكي إيه؟…
_ يا أستاذ حضرتك هطلع لهم بطايق يعني ولا أيه مش فاهمة … الراجل طل لي ببسمة رضا كده وضحك ضحكة مستفزة ظريفة خفيفة مخيفة وبعدين قال لي… خلاص متعصبيش نفسك يا آنسة أنا عرفت … تحيات إسم فعلًا حلو و فيه كده حياه
هو أيه اللي فيه حياه دا كان ناقص يقول لي إسم فيه حمز كده…زي فيلم الباشا تلميذ .
رحلة البحث عن عريس: المشهد الثالث .
المهم بصيت له وأنا بسأله علشان أغير جو الرعب اللي أحنا فيه ده وقولت:
_ بقولك أيه يا باشمهندس أنت من ساعة ما دخلت عمال تسألني عن أسماء العائلة ولا اللي شغال في السجل المدني هو حضرتك شغال مخبر؟
رجع يضحك نفس الضحكة تاني وهو بيطل للسقف وقال لي بكل ثقة : لا أنا الحمدلله رجل أعمال.
صدري إنشرح وقولت الله أكبر دا شكله العوض .. تغاضيت عن اللي فات من أسئلة مريبة وقولت وماله وتغاضيت عن إلتفاتاته الغريبة وقولت يا بنت وماله .. بما أنك خريجة تجارة ..أدخلي بقى بأسئلة البيزنس بتاعتك.. أخدت نفس عميق وقولت له..
_ طيب وحضرتك أيه نوع الأعمال اللي شغال فيها؟
عدَّل كارفات البدلة وقال لي بكل ثقة: أنا بإذن الله بشتغل في كل أنواع الأعمال.. سفلي وأرضي وجلب حبيب ورد المطلقة أنا وبالصبلاة على النبي مفيش حاجة بتصعب عليا.
هنا بقى أنا هنجت وقومت وقفت وأنا بنادي على بابا وبضحك وبقول له من كثر الصدمة: ألحقني بالبخور يا حج.
الشاب وقف قصادي وهو بيقول: أهدي ووطي صوتك علشان متزعجيش الأسياد اللي معانا في القعدة الكريمة دي لتتأذي..
أبويا وجوز خالتي جو يجروا بيسألوا فيه أيه حكيت لهم اللي حصل وقبل أي رد فعل منهم .. الأخ بتاع الأعمال ميل على علبة المشبك اللي كان جايبها معاه أخدها وبص لي بأستحقار وهو بيقول: للأسف كنت فاكرك متفتحة طلعتي نيرم .
أنا وبابا فضلنا واقفين مهنجين لمدة من الزمن لا تقل عن الربع ساعة مش قادرين نفهم ما الذي يحدث، لحد ما جوز خالتي رجع يحلف لنا أنه أم الشاب ده مفهمة خالتي إن إبنها فعلًا رجل أعمال بس خالتي اللي ما فهمتش نوع الأعمال أيه، المشكلة مش هنا المشكلة فيا أنا إزاي مأخدتش بالي إن صاحبنا جاي يتقدم بعلبة مشبك دمياطي؟!
رحلة البحث عن عريس: المشهد الرابع.
ثالث عريس بقى ده اللي كان حاجة ما تتوصفش بجد … كان جاي عن طريق جارتنا أم محمود اللي بتعزنا وبتودنا وبتسحر لنا كمان، يعني مش مخليه، بتفعل الخير وترميه قدام عتبة بيتنا لأجل أبويا الشهم اللي كان جارهم زمان يصيبه الخير، دخلت علينا ذات يوم تلك السيدة الطيبة الأصيلة وهي تحكي عن العريس اللي عقله إتخطف لما لمحني في خطوبة إبنتها ذات العشرين عام الشهر الماضي
وعلشان ماما متقدرش على زعل هذه الجارة الطيبة الحنونة اللي زعلها غالي وبيوقف حالي وحال بابا وماما وناهد قررت تقبل أنه ييجي يقعد معايا وبعدين تبقى تقول لها مفيش نصيب وأنا علشان مكسفش ماما وافقت أقابله وكمان بصراحة علشان بخاف منها بس ما علينا.. وكالعادة دخلت وسلمت عليه وكان باين عليه إنه شخص هادئ وراسي وعاقل وشيك كمان
كالعادة بابا بيقوم ويقعد بعيد شوي لحد ما نتعرف على بعض .. أول ما بابا قام لقيته بيطلع ورقة وقلم وبيقول لي هو حضرتك عندك أعداء؟ .. إستغربت من السؤال وبصراحة كان نفسي أقول له أيوه جارتنا أم محمود ولكن أخلاقي مسمحتش وأكتفيت أهز رأسي بالنفي.. لقيته طل لي وقال … عليكي مخلفات أو قضايا
تنحت وأنا بقول له: هو حضرتك فاكرني نص نقل ولا قطعة أرض فيه أيه يا أستاذ؟
معطاش أي ردة فعل وقام وطلع من جيبه ورقة إداها لي وناولني قلم وهو بيقول: جاوبي الأسئلة دي وفيه كمان مكان فاضي للإجابة في ظهر الورقة وبسرعة علشان مفيش وقت….. طليت له وأنا بقول في سري ..ليه القطر على وصول ولا أيه؟ منك لله يا أم محمود أنت ومجايبك .. أخدت الورقة منه وقولت أشوف فيها إيه وخلاص.
لسه ببدأ إجابة كده لقيت ماما داخلة بالقهوة وبتحطها قدامه وهي بتقول له القهوة يا أستاذ علي شرفتنا.. هي أمي ذكرت كلمة قهوة كده ولقيناه قام وقف على الكرسي ويصوت أعلى من ميكروفون الجامع فضحنا في المنطقة ويقول قهوة لأ قهوة لأ … عايزين تغتالوني؟ عايزين تموتوني؟ لأ لأ ..وإنطلق في كلمة لأ وأنا وأمي كلبشنا في بعض وهو يقول لأ وأنا وأمي نقول لأ لأ
أبويا طلع يولي ناحيتنا وهو بيسأل فيه أيه وأم محمود جارتنا دخلت على الصوت… وأول ما لمحته واقف على كرسي الأنتريه والقهوه على التربيزة بصت لماما وقالت لها..ليه كده يا أم دعاء حد يقدم لضيوفه قهوة وقامت نادت على إبنها محمود شال العريس من على الإنتريه وخرجوا وأبويا واقف يخبط كف في كف
اللي عرفناه بعد كده من محمود بن أم محمود إن الأخ علي عليوة كان في مصحة نفسية لأنه هوبا حبتين وعنده شيزوفرنيا .. يا حبيبتي يا أم محمود خلتيني أسأل نفسي عن حبك ليا وأقول بعد الحب ده أيه؟ اللي تعمل كل ده تستاهل أيه؟ مش بقول لكم طيبة … يلا الحمدلله إنها عدت على خير … دول كانوا أغرب ثلاث عرسان عدوا عليا.. الباقيين كانوا مش مناسبين ولكنهم طبعيين ولسه مكملة في رحلة البحث عن عريس.
بقلم_ آمنة محمد أبوالخير.. رحلة البحث عن عريس
اقرأ رواية مغامرات سيد ابوغالب من هنا
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
