رواية مغامرات سيد أبو غالب
رواية مغامرات سيد ابو غالب: الفصل الاول
_يعني سبتنا ناكل من إيد واحد مي. ت رغم إنك كنت عارف.
= وأيه يعني مش فاهم، الراجل روحه حلوه ونَفسه في الكبدة لا يعلوا عليه ولا هي عنصرية تجاه الميتين وخلاص.. يعني ميتينك ميزعلوش لو سمعوك بتتكلم عليهم كده.. حط نفسك مكانه.
_ يا أخي حرام عليك كرهتني في اليوم اللي خرجت لي فيه من البوتجاز… كان يوم ماطلعت له شمس يوم ما أكلتك جبنة رومي وعطفت عليك أنت واخواتك.
= هو تمن الجبنة الرومي اللي أكلته هتقعد تعمل عليه حكاية.. وبعدين واحد غيرك يفرح أنه طلع له عفريت ويطلب ويتمنى وهو فرحان وبيضحك مش يقعد يذم فيا كده.
_ عايز تفهمني يعني أني لو طلبت أي حاجة منك هتحصل؟
= ما تجرب يا أخي.. جرَّب.. أنت خسران حاجة.. أنت عندك حاجة تخسرها… جرب بنفسك وشوف.
_ طيب خلاص بتمنى نرجع لمصر، ونلاقي عوض بن اخويا بخير وسلامة، والحكومة متقبضش عليا بعد ما حضرتك ولعت لهم في القسم…… و….! أنت بتعمل أيه… ورافع إيدك للسماء كده ليه؟
= بأمن وراك وأنت بتدعي يمكن تكون دعوتك مستجابة وربنا ينجينا.
_ يا مراري.. يا مراري.. يا أبني حقق لي أمنياتي.. هي دي أمنياتي.
= أه.. فهمت… أما إن أمنياتك حلوة بشكل.. تتربى في عزك يا رب يا أخويا.
رواية مغامرات سيد ابو غالب
_ هي مين دي يا كبريته؟
= أمنياتك… بعدين ما كلها عندها أمنيات.. أنا مثلًا نفسي امسك زعامة القبيلة ومش عارف.. مش كل حاجة نفسنا فيها نلاقيها.. شوف لنا بقى حد يحققلنا اللي عايزينه.
“عوووووووااا”
_ أيه؟ طب إزاي؟ سامع اللي أنا سامعه يا أبني!
= أيه فيه أيه؟ سامع أيه؟ أنا مش سامع حاجة.
_ دا صوت ذئب فيه صوت ذئب! صوت ذئب يا كبريته.
= طيب وأيه الغريب في كده، أول مرة تسمع صوت ذئب ولا أيه؟
_ أول مرة في حياتي أشوف عفريت معدل ذكائه منخفض… الغريب يا أذكى أخوواتك إننا في عرض البحر…
=متقولش كده يا أبو السيد… وحد الله بس أحنا مش في عرض البحر.. أحنا في عرض ربنا، وبعدين ما يمكن ذئب البحر.
_ذئب البحر! يلا أنت بارد… بارد…حسبي الله ونعم الوكيل فيك يا كبريته يا أبن منجم… هو فيه حاجة أسمها ذئب البحر يا اللي يبتليك بذئب ياكل عائلتك عفريت عفريت.
= مش فيه كلب البحر، يبقى اكيد فيه ذئب البحر وعلى العموم حبيبي تسلم منتحرمش.. ربنا يجعل لنا نصيب من دعائك يا حج سيد..
” عااااوووووووو” ” عااااوووو”
_ أهو! سامع.. سامع بيعوي إزاي؟
= أه فعلًا… صوته فيه بحة كده.. تصدق صوته حلو… ممتاز.
_ صوته حلو! هو أنت فاكره أم كلثوم.. وبعدين أيه عدم المنطقية اللي بتحصل معايا دي.. يعني في عرض البحر على مركب تايهة مع عفريت اسمه كبريته لسه عيل وعنده ١٠٠ سنة بدور على بن أخويا اللي ضايع وسامع صوت ذئب جاي من المايه… هيحصل فيا أيه اكثر من كده.
= اهدى… اهدى يا سيد متخافش أنا معاك وبعدين لو جالك الضغط ولا السكر مين هينفعك… قولت لك أنا معاك.
_ يا فرحتي.. يا فرحتاااي… ما هو المصيبة أنك معايا… أنا مبتلى.. أنا عارف أني مبتلى… وأنا راضي يا رب.. راضي.. كبريته أنا مبعرفش أعوم.
= إزاي يبني فصيلتك كلها بتعوم… المفروض دي طبيعة موجودة فيك.
_ هو أنا كلب يا ابني علشان تكون دي طبيعتي…
= طيب ما تجرب.. مش يمكن تطلع بتعرف.
_ هو أنا لو جربت فعلًا هطلع.. بس هطلع فوق عند ربنا.
رواية مغامرات سيد ابو غالب
= بص يا سيد… أنا عايزك تطل لنص الكوباية المليان… صوت الذئب ده مش يكمن هو بن أخوك اللي بندور عليه… أنت ناسي أنه إتحول بعد ما أكل كبدة عمي حامد الجامد.
أومأ سيد برأسه ثم نظر كلاهما للإتجاه الذي يأتي منه صوت العواء الشديد.. دونما رؤية شيء بسبب الضباب الشديد الذي تشابك مع بعضه فوق مياه البحر كخيوط العنكبوت الهش ماددًا ذراعيه تجاههما سارقًا رؤية عينيهما.
بدا أمامها ظلام البحر الهائج كصوف خروف أسود يهتز، وراحت برودة المياه تتسرب لنفس سيد، بينما اختفى كبريته من حوله وكأنه بخار ماء خرج من رئتيه وتبعثر دونما تحذير
قبل أن يهتز جسد سيد فجأة ليقع على أرض السفينة نتيجة لسكونها فور إرتطامها بشيء أوقفها!
قام من مكانه وهو ينظر عبر حافة المقدمة ليرى أنها قد رست على أرض يابسة تطلع حوله وهو يقول:
_ كبريته.. هو أيه ده.. كبريته؟ آه يا ابن ال….. يا جبان.
لم يجده حوله فعاد لسبه من جديد وهو يتذكر كل ما مر به بسبب ذلك المدعو كبريته ذلك الشبح الذي ظهر في حياته في فجأة منذ إنتقاله للدراسة في القاهرة ثم تورط ابن اخيه معه ليتحول لكائن لا يعرف له أصل ولا فصل بعدما مرَّ معه بمغامرات لا حصر لها.. آخرها عروسه التي كانت تسير على الحائط.
ثم ها هو الآن يقبل بكل شروط ذلك العفريت ويسير خلفه حتى يجد بن اخيه عوض.
سمع صوت الذئب مرة أخرى وهو ينزل من السفينة للأرض المجهولة والتي يبدو أنها مجرد جزيرة خاوية من أي معمار أو سكان أحياء يبدو أن تاه في البحر لا أكثر…
تقدم خطوات أخرى على الشاطي المظلم والذي لا ينيره سوى ضوء القمر المكتمل.. هاج البحر أكثر وأشتدت الريح.. فركض لداخل الجزيرة تجاه الأشجار وهو يلعن ذلك العفريت الذي يُدعى كبريته والذي تركه هنا بمفرده وهو يتسائل بأي مكان من العالم هو يا ترى؟!
رواية مغامرات سيد ابو غالب
مشى عدة خطوات مهتزة ببطئ يقدم قدمًا ويؤخر أخرى وهو ينادي قائلًا:
عوض… يا عوض.. يا عوووووض… يا كبريته.. إلهي يا رب تولع ويطفوك وتغرق في البحر وتطفو كده على السطح وأشوفك وأنت طافي مبلول.
جاءه صوت من خلفه يقول بتلاعب ورقة مبالغ فيها:
نعم يا قلب عوض.. يا عيون عوض.. وبعدين أهون عليك يا سيد يا قاسي يا جارح إحساسي.
لم يكن ذلك سوى كبريته الذي ظهر مرة واحدة ممدًا على باطنه على فرح شجرة مرتفع فوق رأس سيد الذي رمقه بمقت شديد
رواية مغامرات سيد ابو غالب
رفع سيد رأسه ينظر إليه وهو يقول:
_ كبريته أنت هنا… الحمدلله أنا قولت بردو أنك مش هتسيبني وتمشي علشان جدع.
= كفاية يا بني آدم هتولع من الكدب وأنت واقف .. دا الشجر والحجر والقمر شاهدين على سبَّك ليا.. يا أخي دا أنت لاعن جدي السابع لحد دلوقتي 53 مرة ونص… أيه واخد له أجازة.
_ معلش يا كبريته أخوك بردو وفي الغربة وتايه ومعرفش حاجة
= خلاص، أيه ده كله.. هتشحت على الجزيرة؟ ناقص تقول لي معايا شهادة من مستشفى الهرم ومحتاج فلوس علشان أعاود البلد.
_رجعني يا كبريته.. رجعني مصر.. من وقت ما الحريقة قامت في قسم الشرطة والدنيا ظلمت في وشي ولقيت نفسي في اسكندرية وأنا مش فاهم أنا بعمل أيه ولا رايح فين؟
= يا أبني بندور على عوض.. أنت نسيت ؟ بعدين متقلقش… كده كده أنا معاك.. وطول ما أنا معاك ماتخفش.
” أوه أوه أوه أووه”
_ أيه الصوت ده؟ أيه ده؟ أنت سامع زيي اللي أنا سامعه.
= يوه.. فيه أيه يا سيد.. هو كل شوي سامع.. سامع.. هو حد قالك إني مولود من غير ودان، وبعدين سد أم ودنك دي اللي جايبة لك الكافيه.
_ يا أبني فيه صوت غريب.. دوشة شديدة جاية ناحيتنا… يلا نجري أنا خايف.
رواية مغامرات سيد ابو غالب
= أثبت يا سيد كده متخافش.
قالها كبريته وهو يختفي تلقائيًا حينما ظهرت من بعيد أجساد كثيرة وأضواء مختلفة الأحجام مصحوبة بأصوات صراخ وعواء شديد تركض نحوه وتلقائيًا ركض في الأتجاه المُعاكس والسهام تمطره من كل تجاه
ظل يركض بين الأشجار ومن خلفه السماء تمطر سهامًا، لم يكن يرى أي شيء حوله… أظلمت الدنيا بقوة… وفجأة شعر أنه أخف من الريشة حينما هدأت الأصوات من حوله
ثم عادت مرة أخر وقد وجد نفسه يرتفع عن الأرض للأعلى، تطلع أسفل منه فوجد مجموعة من الرجال عرايا إلا من أوراق الشجر التي تغطي عوراتهم
رواية مغامرات سيد ابو غالب
وقد صُبغت وجوههم بألوان عده وعلى رؤوسهم الريش ممسكين بحراب ومتسلحين بأقواس وسهام من الخشب، حاول أن يُفلت من بين أيديهم وهو يصرخ بقوة مناديًا على كبريته قبل أن يصل لمنطقة مضاءة بالنيران.. مزدحمة بأشخاص يشبهون من يحملونه بقوة.. اختلفوا بين نساء ورجال وأطفال وشيوخ.
كان يتطلع للوجوه الغريبة بخوف من فوق اكتاف من يحملونه حتى أقتربوا من قدر كبير واسع ممتلأ بالمياه وبدون مقدمات ألقوه داخله ليضعوا معه الكثير من النباتات.. ثم أشعلوا أسفل القدر.. ليصرخ سيد بقوة بعدما استفاق من صدمته.
بقلم/آمنة_محمد رواية مغامرات سيد ابو غالب
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
