قصص مؤثرة قصيرة: مكانك في قلبي

قصص مؤثرة قصيرة “مكانك في قلبي” للكاتبة مريم الجنيدي.

قصص مؤثرة قصيرة

_ سليم أنت رجعت من الشغل!
_ اه يا حبيبتي حضريلي الأكل بسرعة
_ عيوني تحب تاكل هنا ولا في البلاكونة
_ خلينا هنا أحسن

حضرت الأكل و حطيته على الترابيزة و ناديت عليه لكنه مردش
_ سليم ! سليم! سليم أنت نزلت تاني؟!

قعدت أكل لواحدي و أنا زعلانة و مضايقة إنه نزل منغير ما يقولي، استنيته كتير لكن أتأخر أوي و فونه مقفول

و لما جه كانت الساعة بقت ١٢
_اي يا سليم كل دا كنت فين! استنيتك كتير نزلت امتى أصلًا!

_معلش يا حبيبتي جالي شغل مستعجل
_ شغل اخرك أوي كدا! طب كنت عرفني قبل ما تنزل حتى! لي تقلقني كدا، و كنت حطيت الأكل

_ معلش حقك عليا، نزلت على طول فكرتك سمعتي الباب، كنت بتكلم في الفون

_احطلك الأكل!

_ لا أكلت برا خلاص مش عايز
_ كدا يا سليم تأكل برا كمان بعد ما تعبت في الأكل

مسك أيدي و باسها
_حقك عليا هاكله بكرا و بلاش تطبخي ارتاحي

المشهد الثاني

صحيت من النوم تاني يوم ملقتهوش
حاولت أتصل بيه لكنه مش بيرد، حاولت كتير الفون مقفول
_ بجد بيعمل كدا لي! بيقلقني عليه لي!

بعت رسايل كتير ليه
_ سليم أنت فين رد عليا و طمني
_ سليم أنت عارف إن مش بحب كدا
_ لما ترجع بجد متتكلمش معايا
_ اليوم كله متردش عليا ولا تطمني
_ سليم بلاش الشغل دا بقا بجد قلقتني

فضلت قاعدة مستنية و برضو جه بالليل الساعة ١٢
_ أنت كنت فين اليوم كله

_ كان عندي شغل من بدري و لسه مخلص

_ أنت بجد بتهزر ؟!

_ أهدي بس
_ أهدى اي أنا بكلمك من الصبح مش بترد على الرسايل، و الفون مغلق، و … أنت حتى مفكرتش تطمن عليا

_ الفون فصل، والله ..

_حجة كل يوم الفون فصل الفون فصل، و كانك متجوز كلبه و سايبها

_اهدي متزعليش حقك عليا، تعالي هعوضك تعالي نتعشى مع بعض و نتفرج على فيلم سوا

_مش عايزة، الأكل على البوتجاز سخن و كل لو عايز

دخلت اوضتي و أنا بجد كنت متعصبة و حزينة أوي من التجاهل اللي بيعمله فيا
عدى كذا يوم وهو بيحاول يصالحني لكني كنت موجوعة منه و مش عايزة أتكلم

قصص مؤثرة قصيرة المشهد الثالث

صحيت مرة من النوم و برضو ملقتوش، فضلت مستنياه كتير و مفيش قررت مش هتصل بيه و هتجاهل الموضوع، لكن اليوم عدى منغير ما يجي و تاني يوم برضو ماكنش جه، القلق احتل قلبي و مبقتش عارفة أعمل أي، كنت مرعوبة يكون حصل له حاجة

أتصلت بماما و طلبت منها تيجي ضروري
_ في أي يا بنتي مالك يا حبيبتي!
_ ماما سليم من امبارح مختفي و فونه مقفول أول مرة يبات برا و مكلمنيش، و أنا خائفة يكون حصله حاجة

فضلت تبص ليا بسكوت و أنا خوفت أكتر
_ ماما ساكته لي سليم حصله حاجة! أنتِ عارفة حاجة!

قربت مني وحضنتني وهي بتعيط
_ يا نور عيوني فوقي يا حبيبتي بسم الله، فوقي يا ريم سليم مات من شهرين يا ريم، فوقي يا حبيبتي

تمت
_ مريم الجنيدي

 

للمزيد من القصص القصيرة الممتعة، والروايات الشيقة، تابعوا منصتنا عوالم من الخيال، التي تضم العديد من الأقلام المبدعة.