سكريبت قصير رومانسي يدور حول قصة رومانسية تبدأ برفض العروسة لقاء العريس، فكيف تدور الأحداث؟ وماذا مخبي لهما القدر؟.
سكريبت قصير رومانسي
_يعني هو بالإجبار!
_مش إجبار على قد ما هو مناسب
_وأنا شيفاه مش مناسب
_شوفتيه فين إنتِ ده لسة هييجي كمان يومين، بلاش تبقى متهورة يا فرحة
_يوه
قُومت من مكاني ودخلت المطبخ اعمل اي حاجة تهديني بعيد عن ضغط الأعصاب بتاعهم ده، ولكن كأن القدر وهما متفقين عليا، النسكافية خلص!!!
_كان هنا برطمان نسكافية راح فين؟
_خلص من كُتر الأيس كوفي اللي بتعمليه!
_هنزل أجيب جديد
_انزلي بس متتأخريش
دخلت لبست علشان أنزل، مش هقدر أتعايش من غيره ومش هقدر اكمل اليوم ولا النقاش بتاعهم بكل أريحية زي ما هما عايزين!
المشهد الثاني
_لو سمحت عايزة برطمان نسكافية ويكون مش مقاطعة
_اتفضلي يا فندم عندك كل الأنواع اللي تحتاجيها في الرف التاني
_تمام
دخلت وبدأت أدور بين الأنواع الكتير اللي قابلتهم في السوبر ماركت وخاصةً الرف التاني اللي قال عليه، وأخيرًا وبعد حيرة كبيرة استقريت على نوع من مفضليني ولكن قبل ما إيدي تتمد عليه لقيت ايد تانية بتاخده
_خير!
_حضرتك بتكلميني؟
_أنا كنت هاخد البرطمان ده!
_مفيش مشاكل اتفضليه وأنا هشوف غيره
حسيتني قليلة الذوق وبخرج غضبي فيه وهو شخص ملوش ذنب غير انه بيشرب نفس النوع اللي بحبه!!
وقفت لحظة أراجع نفسي وحسيت بإحراج كبير على طريقتي ونبرة صوتي اللي طلعت عالية غصب عني
_أنا آسفة والله مكنش قصدي، بس يعني اليوم مكنش ألطف حاجة وغضبي خرج عليك بقا
_لا ولا يهمك، ساعات بتحصل وكلنا بيعدي علينا أيام زي كده، المهم اتفضلي البرطمان
_شكرًا، لا خلاص خده أنت
_طب ما هاخد انا واحد وأنتِ واحد
_وهو لو في واحد تاني كنت هتكلم عليه ليه!
_وأنا هسيبلك البرطمان واعتبريه عربون صُدفة بينا
_عربون صُدفة! ده مُسمى جديد ده؟
_بالنسبة ليا كشخص بيحب الصُدف وبيآمن بيها فالمسمى يمكن يبقى له أجزاء كتير وحكايات أكتر
المشهد الثالث
ابتسمت وخلصت حسابي مع الكاشير وروّحت البيت، دماغي هادية شوية، مش هتخانق مع حد بالعكس هعمل أيس كوفي وهدخل أنام بهدوء وسلام وحوار العريس ده نشوفه الصبح لما نصحى
_تفتكري شكله حلو؟
_وهو لو شكله حلو ده دافع إني أوافق؟
_يمكن!
ابتسمت وقعدت أكمل اللي بعمله بكل برود أعصاب، لحد ما أنفذ كلامهم وأقابل العريس المرفوض
_جهزتِ؟
_لا لسة هقوم اكمل لبس أهو
_طب بسرعة علشان هما خلاص على وصول
مكملتش كلامها وسمعت جرس الباب بيرن، لهوجة وناس بتجري يمين وشمال، مين دول؟
_السلام عليكم ورحمة الله وبركاته
الصوت ده ودني سمعته قبل كده! مش غريب بربع جنية عليا! خرجت بصيت من بين الستاير لكن للأسف مشوفتش حاجة
_هتخرجي دلوقتي بالعصير، حسبي تدلقيه
_هحاول
_اسمها حاضر، مش هحاول
مسكت الصنية بإيد بتترعش وجسم كله متلج، كل ده ليه؟ هو أنا في إمتحان ثانوية عامة!
_طب انا كنت عايز من النسكافية
_أنت؟
_جاي أشرب أيس كوفي يا عروسة
_بأي وجه ولا بأي صفة؟
_طب ده انا حتى بقولك يا عروسة يا فرحة!
_مش يمكن موافقش؟
_بس أنا واثق في نفسي وفي إختياراتي
_طب وإختياري انا؟
_مستعد لأي سؤال
_علاقتك بربنا عاملة إزاي؟
_الحمد لله راضي عنها بشكل كبير، ربنا يرضى عنا جميعًا
_اللهم آمين
_بس كده؟
_مش عارفة
المشهد الرابع من سكريبت قصير رومانسي
سكت لحظة، وفضلت أبصله بتركيز، عيني بتدور في ملامحه عشان أفهم، هو فعلاً نفس الشخص اللي قابلته عند رف النسكافيه نفس الابتسامة، نفس النظرة الهادية اللي لسه فاكرها، هو كمل كلامه بنبرة واثقة لكن مش متكبرة وقال
_بصي يا فرحة أنا مش جاي أبيعلك كلام حلو، أنا جاي أقولك إني شوفت فيكِ حاجة مميزة حتى وإنتِ متعصبة، وبقيت حابب أعرفك أكتر من اللحظة دي.
ضحكت من غير قصد، والارتباك اتبدل براحة غريبة:
_مميزة وإحنا بنتخانق على برطمان نسكافيه؟ ده تعريف جديد برضه من تعريفاتك؟
_وافقي بس وأنا هجيبلك 100 برطمان نسكافية من ده
_قد كلامك؟
_هتعمليلي أيس كوفي معاكِ ونشربه سوا وقت الفجر في البلكونة؟
_اتفقنا
_يبقى خير البر عاجله، ولا إيه؟
༺༻༺༻༺༻༺༻༺༻༺༻༺༻༺༻
بقلم رنا محمد “حبة البُندق”
رأيكم يهمنا.
للمزيد من القصص، والروايات الشبابية، يقدم لكم موقعنا عوالم من الخيال مجموعة من القصص، التي تأخذك إلى عالم آخر، وأحداث شيقة.