قصة كوميدية قصيرة: “نرمين والواي فاي”

قصة كوميدية قصيرة “نرمين والواي فاي” فصة واقعية في قالب كوميدي ممتع، تعرف على أحداثها من خلال السطور القادمة.

قصة كوميدية قصيرة

العالم بيتأمر ضدي، النت خلص والتليفون فصل، مش فاضل غير نص ساعة بس، أعمل ايه.

جريت على أمي اترجتها تشحن الباقة، رفضت وقالتلي وأنا مالي قولي لأبوكي.

طالما فيها أبوكي يبقى مش موافقة، هو آخر أمل، عملت
كوباية شاي سكر زيادة ودخلت قعدت جنبه في البلكونة.

بص للكوباية وبصلي:

_ نت مش هشحن، أنا مجدده تلات مرات ولسه باقي       على آخر شهر عشر أيام.

اتعلقت في كتفه، شوية وهيعيط:

_ آخر مرة والله، حصة الكيميا هتفوتني، يرضيك بنتك حبيبتك تشيل المادة؟

سحب ايده وشرب من الشاي وقالي:

• ادي أخرة الفيديوهات الـ بتسهروا عليها، شاهد ميسي قبل الحذف، وطريقة الجلاش العجيبة، وفي الاخر تعملنا مكرونة وكفتة لما بطني عجنت.

_ يعني مش هيتشحن؟

• لا.

دخلت اوضتي وشيلت الموبايل من الشاحن، دورت على أي رسالة من الشركة تكون عطفت عليا فيها بميجا هدية، إن القي مفيش.

قلت خلاص مليش نصيب احضرها، هتصل بأي واحدة من صحابي تصورلي المحاضرة، وأنا بدور على رقم إسراء صحبتي صادفني اسم نرمين جارتنا.

علاقتنا طبيعية كجيران وقرب سننا مخليها احسن شوية، اتصلت بها وشرحت لها الوضع، فوافقت بشرط هي ساعة واحدة واقفل الواي فاي بعدها.

أخدت منها الباسورد وبكتب ورا المدرس أول بأول، وهي كل شوية تبعتلي، خلصتي؟

أقولها لسه، تفوت عشر دقايق تبعت نفس الرسالة، لو مش عارفها إن كنت قلت عندها زهايمر، استحمل زنها لحد ما اخلص.

بتفكرني كل دقيقتين إنها عملت معايا معروف، من غيرها كنت هغني ظلمُه، شكرتها بدل المرة الف وهي على وضعها.

عدت الساعة وقفلت النت ولسه شغال، طب ازاي؟!اكلمها اتأكد منها؟ لا، ستظن إني محتاجه تاني، فتحت الباب وبصيت على الروتر، شغال!!!

_ ماما أنتم شحنتم النت؟

كملت تقطيع في البصل وبكل ثبات قالتلي:

_ اُمال أنتِ  فاتحة منين من الجيران.

عيني دمعت مش عارفة إذا كان من البصل ولا من ذل نرمين ليا، كانوا قالوا، عملنها مفاجأة ليه.

#التقى.
#نرمين_و_الواي، فاي.
#حكايات_توتا.

 

إلى هنا نكون قد وصلنا إلى نهاية هذا الجزء من “نرمين والواي فاي”، انتظروا الأجزاء القادمة على موقع عوالم من الخيال.