قصص رعب قصيرة: عيد الحب الدامي.

قصص رعب قصيرة: عيد الحب الدامي.

أهلًا.. أنا علاء عندي 29 سنة والدي الله يرحمه توفي من حوالي خمس سنين وساب لي فلوس كثير أوي.. مفيش حاجة كنت بحتاجها إلا وباخدها.. المعادلة بسيطة عيل طايش وفلوس كثير فطبيعي يوصل بيا الحال لدرجة عالية من التهور.. والدتي من سيدات المجتمع زي ما بيقولوا أو بقت كده في الفترة الأخيرة خاصة بعد ما نقلنا لواحدة من المناطق الراقية في البلد.. بس أنا للأمانة محبتش الأجواء فرجعت لبيت أبويا من تاني

قصص رعب قصيرة

رجعت ادور على حاجة فاقدها حاجة مش موجودة في المناطق دي، بعد ما جربت كل ملذات الدنيا الفاخرة ومستكفتش. عشت في بيتنا القديم في السيدة بتفرج على الدنيا من قرب.. مش من وراء الزجاج.. لحد ما وقعت عيوني عليها وسحرتني بسحرها

زينب.. بنت هادئة، رقيقة، مؤدبة،  جمالها غريب وعيونها تسع الكون… زي ما يكون خطفت عقلي وقررت أدخل الباب من بيته علشان عارف إني اللي زي زينب ليهم طريق واحد

وسألت عنها وعرفت قصتها من الألف للياء،  اتقدمت لها وطلبتها من مامتها وكان ردها الرفض لأنها مكتوب كتابها على بن عمها اليتيم اللي مسافر الكويت وهيرجع قريب يتمم الزيجة،  يعني متزوجة بالأساس.

وقتها خرجت من بيتهم وقررت أنساها بس معرفتش،  مقدرتش طول الليل والنهار وأنا مش بفكر غير فيها، قررت أتقدم تاني،  صحيح ده جنون لأنها بالأساس متزوجة ولكن يمكن لما تشوف اللي أنا أقدر أقدمه لها تقتنع وتتطلق من بن عمها أو تخلعه خاصة مع فلوسي الكثير وحالتها شبه المعدومة..كل البنات نفسها تتزوج حد غني اكيد، يجيب لها اللي نفسها فيه واكيد زينب منهم ووقتها هتجوزها في يومها علشان هي ملهاش عدة بالأساس

أنا عارف أنه مينفعش أخطب على خطبة أخويا  زي ما الدين بيقول مش أفسخ عقد ولكن.. ده اللي حصل.

قصص رعب قصيرة: رد زينب.

بالفعل بعدها باسبوع بس روحت لها زيارة من تاني وأخدت معايا هدايا كثير وشريت لها شبكة وعرضت عليها أكتب لها ڤيلا وعربية وكمان أقدم لها المهر اللي عايزاه والشبكة اللي عايزاه ولو طلبت أي حاجة هجيبها ولكن كان الرفض القاطع منها.. لأ.

مش بس ده كان ردها.. لأ زينب لمت عليا أهل المنطقة كلها وبهدلتني وأهانتني وقالت لي إنها ست متزوجة ولو شافتني قريب من بيتها بس هتبلغ عني،  وإني بستغل ضعفها لوجدها وحيد مع امها وسفر زوجها وموت والدها وإنها وحيدة.

في الفترة اللي بعدها.. مقدرتش أبطل تفكير في كونها هتضيع مني.. بقيت أراقبها في كل مكان تروح له.. الشغل.. البيت.. السوق.. صحابها.. حفظت جدول يومها وخطواتها وكل ده من غير ما تعرف

عرضت عليها الزواج تاني بس المرة دي مسكت فيا والناس اتجمعوا وعملت لي محضر عدم تحرض.

كنت حاسس نفسي مجنون زينب وكأنها بقت إدمان بالنسبة لي بقت كل حياتي..كانت النفس اللي بتنفسه..لدرجة إني كنت براقبها وانا لابس لبس واحدة ست منتقبة..

قصص رعب قصير… عوالم من الخيال.

فكرت إني أخطفها بالفعل وحكيت الموضوع لواحد من صحابي علشان يساعدني في الموضوع.. ولكنه استغرب مني ورفض.. بس في نفس الوقت عرض عليا عرض تاني.. عرض غريب.

قصص رعب قصيرة: سحر إلى زينب.

قصص رعب قصير.. عبر منصة عوالم من الخيال.

صاحبي عرض عليا عرض غريب.. وهو إني أروح لساحر يعرفه وهو هيساعدني إن زينب تيجي لي راكعة وكمان تطلب إيدي.. لما سألته عن إن كان ده معقول قال لي أنه أنه فيه نوع من انواع السحر اسمه جلب الحبيب وإن كل اللي عليا أعرف اسم ام زينب ايه والشيخ هيتصرف.. بس اهم حاجتين أدفع فلوس كثير وانفذ اللي هيقول لي عليه.

تحمست للفكرة رغم إني كنت قلقان ولكن قولت وماله لما أجرب.. أنا عايزة أي طريقة تخليني أتزوج زينب وتوافق عليا واتفقت مع صاحبي ياخدني للساحر ده وبالفعل بعد يومين كنا عنده

طلب مني حاجات معينة واديت له صورة زينب واسم أمها وحاجات تاني معينة،  وبالفعل قال لي مقلقش كل الأمور تمت وزينب خلال يومين هتكون عندي في البيت بنفسها وحدد لي الساعة واليوم.

وشرط عليا شرط بسيط.. ورقة صغيرة توصل لزينب وتكون معاها لمدة ليلة كاملة.. في البداية مكنتش عارف إزاي هوصل لها الورقة دي وأزاي هقدر اقنعها بيها

وبعد تفكير ساعات كان الطرد وصل لزينب ليلة عيد الحب من زوجها المغترب.. طرد صغير مع عامل توصيل مبعوت بإسم خطيبها على الساعة 12 بالليل وخلال الوقت ده زينب بتكون نايمة ووالدتها اللي هتستلم الطرد،  يعني هيبات معاها من غير ما تعرف.

قصص رعب قصيرة: المكتوب ما فيه منه مهرب.

قصص رعب قصيرة.

وخلال يومين على الساعة عشرة بالليل في نفس الميعاد اللي الراجل حدده لحضور زينب.. رن الجرس وفتحت  وكانت هي بالفعل.. واقفة تايهة مش مجمعة الكلام.. بتضحك من الوقت للتاني.. مكنتش مصدق نفسي.

حسيت الفرحة مش سيعاني.. دخلتها وقعدت قدامي.. قعدت أعبر لها عن كل اللي في قلبي.. بس وأنا بتكلم مرة واحدة فاقت وطلت لي بخوف ومش فاهم أيه اللي حصل لقيتها فضلت تزعق وتضرب فيا بدون سبب

حاولت اهديها ولكن كانت خايفه ومش مستوعبة هي بتعمل أيه في بيتي.. وكأنها لما جات لي كانت متخدرة.. لمحت البلكونة وإحنا في الدور الثاني.. جريت ناحيتها ومن دون تردد رمت نفسها.. صرخت بكل قوتي وقلبي كان هيقف من الخوف

طلبت صاحبي اللي بيخلص لي كل أموري اخدها رماها قدام المستشفى.. كنت مرعوب إنها تموت ولكن الخوف كان مسيطر عليا.. الخوف اللي ممكن يحولك لوحش ويكشف معدنك الحقيقي.. الطمع اللي هيحولك لقاتل علشان تحصل على اللي عايزه.. حب النفس والغرور اللي هيحولك لشيطان.

كنت متابع مع صاحبي بالتليفون كل اللي بيحصل.. قال لي إنها دخلت العناية المركزة بين الحياة والموت.. وقتها كنت هتجنن روحت للساحر اللي عمل لي العمل وهددته وضربته وطلبت فلوسي اللي نصب عليا فيها لإن العمل مشتغلش ولكنه وعدني بأن اسبوع بس وهيرد لي زينب زي ما اتفقنا

قصص رعب قصيرة: وإنقلب السحر على الساحر.

قصص رعب قصيرة.

عدا اسبوع كامل وعرفت إن زوج زينب نزل ونقلها لمستشفى خاص.. وحالتها استجابت للعلاج وفاقت.. ومن هنا أخبارها إنقطعت عني.

علشان حياتي إنقلبت جحيم بعد الإسبوع ده.. خاصة لما ظهرت لي زينب.. بس مش زينب اللي عايزها…زينب اللي هتقضي عليا

الموضوع بدأ لما رجعت من واحدة من سهراتي،  وقفت قدام المرايا بعد ما اخدت دش

سمعت صوت حركة في الحمام.. وبعدها الباب انفتح اتخضيت وأنا بطل للباب اللي بينفتح لوحده ومفيش حد جوه وقلبي وقف بعدين سمعت صوت حد بينادي عليا..

“علااااء.. علاااااء.. أنا جيب ” قصص رعب قصيرة..

فضلت أنادي وأسأل.. مين؟  مين اللي بينادي؟  محدش كان بيرد،  جريت ناحية الحمام اشوف مين حوه ملقتش حد قفلت الباب وخرجت

بصيت ناحية باب الغرفة لقيته بيتفتح بالراحة وفجأة رياح شديد ساخنة دخلت منها لدرجة إن كل اللي واقف قصادها اتحرك.. كل حاجة قصاد الباب اتكسرت حتى أنا رجعت للخلف واتخبطت في الحيط من خلفي.

إيدين سوداء بأظافر طويلة اتمدت ومسكت في جمب الباب.. قلبي دق بقوة،  وصرخت صرخة زي ما يكون بحتضر لما لمحت رأس بتخرج من خلف الباب وبتطل لي..

عيون حمراء ضيقة بالطول وفم متسع بيصل للأذن بأسنان  حادة بأعتبار إن الأذن اللي بطول 30 سم دي نسميها أذن.. وأنف يشبه لحد كبير أنوف القطط.

كنت بصرخ بهستيريا وبدون توقف خصوصًا لما لسان الكائن اللي يشبه لسان الحية ده خرج بلونه الأسود.. وظهر جسمها اللي يشبه جسم الحمار الأسود الصغير.. حاجة بشعة لا يمكن تكون شوفت زيها قبل كده في حياتك.

حاجة خرجت من جحيم العالم السفلي وعقاب بشع هتعاقبه على كل أفعالي اللي عملتها،  جريت ناحيتي وهي بتضحك ضحكة رفيعة شديدة وهي بتقول:

” أنا جيت.. أنا جيت.. زيلوزيلا.. زيلوزيلاااااااا”

وقتها وقبل ما توصل لي.. أغمى عليا ومحستش بحاجة،  فوقت لقيت نفسي واقع جمب الحيط والنهار طلع.. ومن وقتها وكل يوم نفس الحالة.. بقيت أكره اقعد لوحدي علشان متظهرش ليا فبقيت اشوفها وسط الناس.. الكل فكرني مجنون بسبب صرعي المفاجأ وكوابيسي الكثيرة جدًا

وزني نزل من قلة النوم والأكل وكثرة التفكير.. تحت عيوني اسود وامي عرضتني على دكاترة نفسيين  كثير وسحرة كثير بين نصابين ودجالين وسحرة حقيقين.. محدش عرف تفسير لحالتي

لحد ما اتعرفت على واحد افريقي قال لي لما حكيت له قصتي اللي بدأت من خمس سنين.. أني وقعت مع حد عنده قوة في المجال ده وعلشان ينتقم مني سلط عليا شيطانة علوية مجنونة.. وأني صعب أتخلص منها افتكرت الساحر اللي وعدني هيرجع لي زينب لما ضربته خلال اسبوع وبالفعل وقتها ظهرت زيوزيلا.

وقتها بس عرفت إن حق زينب وكل اللي قبلها من بنات رجع وإني هفضل ادفع حق الناس دي طوال عمري.

بقلم/آمنة محمد ابوالخير

لو عجبتك القصة تابع قصة أخرى من هنا:

قصص رعب قصيرة:ثلاجة الخالة2