رواية مهمة في عنبر 14
مهمة في عنبر 14
رواية مهمة في عنبر14 ظلّ الحقيقة الأولى
قالت اللي واقفة جوا العنبر بصوت ثابت، وصدى كلامها بيرجع من الحيطان
أيوه أنا مفاجأة، مش كده؟
الإضاءة الخافتة كشفت ملامحها تدريجيًا؛ سمر فضلت ثابتة، عينيها بتلمع بغموض، وابتسامتها الغريبة كانت بتقول إن اللي جاي مش سهل مش عليهم هما بس، على الكل؛ أدهم كان واقف بين الاتنين، عينه بتتنقل بينهم بسرعة، بيحاول يفهم النظرات اللي بتتبادل في صمت.حسّ إن في حاجة أكبر من مجرد مهمة حاجة هما مش عارفين عنها أي حقيقة؛ أدهم شد نفسه خطوة لقدام سمر انتي تعرفيها؟
سمر ماجاوبتش فورًا، قربت خطوة من اللي واقفة وقالت بصوت منخفض
اللي يسأل كتير يتوه؛ إحنا لسه مابدأناش يا أدهم.
اللي كانت واقفة قدامهم ضحكت ضحكة بسيطة
واضح إنكم جيتوا بدري أنا كنت مستنيا اللحظة دي كنتم فاكرين إنكم جايين تكتشفوا سر؟! ده أنا اللي سبت لكم طريق الدخول مفتوح.
أدهم اتعصب، مسك سلاحه بإحكام
يعني إيه؟ انتي مين في الأصل؟ وبتلعبي لعبة إيه هنا؟
بصت له بثبات
إهدا ياحضرة الظابط مش كل حاجة بتتحل بالرصاص.
سمر رفعت إيدها قدامه تطمنه
سيبني أنا…
و بصتلها تاني
عايزة إيه؟ وليه مستنيانا؟
اللي قدامهم قربت خطوة، والمكان كله حسّ ببرودة غريبة
اللي أنا عايزاه إنكم تسمعوا الحقيقة عنبر 14 مش سجن.
ومش مقر مخابرات ده فخ وأنتوا الاتنين دخلتوه برجليكم.
أدهم حس إن قلبه وقع للحظة
فخ؟ لمين؟
سمر بصلها بحدة
وانتي إيه علاقتك باللي بيحرك الجرائم من برّه؟
ضحكت تاني…
علاقتي؟! أنا البداية.
أدهم اتقدم خطوة بعصبية
وهتبقي النهاية لو ما اتكلمتيش بوضوح!
سمر وقفت بينه وبينها
استنى اسمعها للآخر.
الهدوء نزل فجأة، والهواء بقى تقيل.
والكلام اللي هيتقال بعدها كان كفيل يغير شكل المهمة كلها
رواية مهمة في عنبر14 الحقيقة و الوهم
أدهم خرج من عنبر 14 وهو مش قادر يتنفس…
مش عشان خوف، لكن عشان الصدمة اللي بدأت تخبط في دماغه واحدة ورا التانية؛ الهواء برّه كان ثقيل، كأنه بيعاقبه كل خطوة؛ وقف بعيد عن الباب، حط إيده على راسه، وصوت جوا عقله بيقول
إيه اللي أنا مش شايفه؟! ليه حاسس إن كل اللي عشته… مجرد وهم؟! وكأن عنبر 14 مش كشف سر ده كشف حقيقته هو نفسه.
في اللحظة دي ساب سمر جوّه مع البنت اللي واضح إن علاقتهم مش جديدة رجع الصوت من جوّه العنبر
اسمعيني يا سمر
سمر رفعت إيدها في وشها
اسمعيني إنتي يا جاكلين؛ جاكلين أدهم.
الاسم وقع زي صاعقة؛ وهي لسه بتقول الجملة راحت البنت مكملة
هو هيعرف الحقيقة في خلال دقايق لا، ثواني.
مش ده اللي عايزة تقوليه يا سمر؟
سمر عضّت شفايفها وهي مصدومة
ماكنتش عايزاها تطلع منك لسه الوقت بدري.
جاكلين قربت منها
بدري؟ ده الوقت المناسب أدهم لازم يعرف هو مين قبل ما يعرف إحنا مين.
وفجأة الباب اتفتح بقوة أدهم دخل عليهم، صوته مليان توتر وغضب
تعرف إيه أنا؟ وتعرفي إيه عنها؟ وإيه معنى الكلام اللي بيتقال ده؟!
سمر اتجمدت.
جاكلين ابتسمت الابتسامة اللي ما تبشرش بخير؛ أدهم وقف قدّامهم والحقيقة كانت خلاص على وشك
رواية مهمة في عنبر 14: ساعة كشف الأسماء
أدهم وقف قدّامهم، ملامحه متشنجة، وصوته بيترجّ من غضب مكتوم.لكن اللحظة كانت أثقل من إنه يواجهها لوحده طلع الموبايل من جيبه، وضغط أرقام حافظها من غير ما يبص.
قال بصوت حاد
معتز تعالى عنبر 14 حالًا.
ونهى سيبي كل اللي في إيدك وتعالي هنا.
وياسين محتاجك فورًا.
وقف يسند ضهره على الحيطة، نفسه متقطع، وسمر واقفة جنبه بتستنّاه يهدى.
جاكلين؟
كانت واقفة بثبات غريب كأنها أكتر واحدة مطمنة في المكان كله.
بعد دقائق، الباب اتفتح ودخل الفريق.
معتز أول واحد
هو في إيه؟ شكلك داخل معركة لوحدك.
نهى بقت تبص لسمر وجاكلين باستغراب
إيه الجو المشحون ده؟ مين دي؟
وياسين كان ساكت وهو بيقرب وبمجرد ما شاف جاكلين؟
اتجمد مكانه نهى قربت منه
إيه يا ياسين؟ تعرفها؟
ياسين بلع ريقه وقال بصوت مبحوح
دي دي مش أي حد دي “جاكلين روسو” عميلة سرّية من أخطر العملاء، ملهاش وجود رسمي محدش قدر يوصل لمكان اختفاها ولا يقتحم المكان اللي هي فيه إلا…
وبصّ لأدهم إلا انت.
معتز شهق بتوتر محدش لاحظة
إنت بتهزر؟!إحنا واقفين مع عميلة أشباح؟
جاكلين رفعت راسها، وبصت لهم كلهم
أيوه أنا جاكلين واختفيت عشان كنت هدف كان في عملية اغتيال معمولة ليّ وخيانة من حد قريب.
سمر بصتلها بحدة
وأنا؟ إيه علاقتي بكل ده؟
جاكلين ردت وهي بتقرب منها
إنتِ الوحيدة اللي قدرتي توصلي لعلامتي والوحيدة اللي قدرتي تفكي الشيفرة اللي سبتهالك كنت بتابعك وحميتِك من بعيد عشان الخيانة أقرب مما تتخيلوا.
أدهم اتقدم خطوة
يعني إنتي مستخبية عشان في حد مننا خانّا؟
جاكلين ابتسمت ابتسامة قصيرة وبصت له بدون ما يحس
مش منكم أنتوا لكن حد قريب بما يكفي إنه يضرب من جوّا الفريق.
الكل بصلها بقلق والمكان كله اتسكت.
سمر همست بصوت متوتر
تقصدِ مين؟
جاكلين ردت بصوت منخفض
اللي حاول يقتلني هو نفس الشخص اللي انتم لحد دلوقتي فاكرينه من فريقكم.
عيون أدهم اتسعت
مين في فريقنا مش بتهزري اكيد؟!
جاكلين قالت ومعرفتش نظارها من على شخص
هتعرفوا بس مش هنا والمفاجأة؟ إن الخاين هيظهر بنفسه قبل ما الليل يخلص.
الخطر لسه واقف على باب عنبر 14
رواية مهمة في عنبر 14: بداية اللعبة
الهواء في المقر كان مشحون، والكل رجع لقاعدته قدّام الشاشات وأجهزة المراقبة اللمبات الصغيرة كانت بتنور وتطفي كأنها بتعلن بداية حرب مش مهمة أدهم دخل المكتب الرئيسي، وراه سمر، معتز، نهى، وياسين ولمسافة ثواني المكان اتملى
مدير المخابرات كان واقف قدام الشاشة الكبيرة، ضهره ليهم مجرد حضوره كان كافي يخلي كل واحد في الفريق يشد نفسه وبمجرد ما دخلت جاكلين من الباب الجانبي…
الكل اتصدم محدش فهم إزاي اختفت من عنبر 14 وسبقتهم على المقر ولا إزاي وصلت قبليهم من غير صوت ده حتى الكاميرات ما رصدتهاش.
معتز بص لها
إنتي إزاي؟! اختفيتِ وطلعتي قبلنا! إيه السر ده؟
جاكلين ردت بنبرة باردة
لو قلت لك مش هبقى جاكلين.
مدير المخابرات لفّ ناحيتهم، صوته كان مليان جدية مالهاش لعب
اسمعوني كويس اللعبة بدأت والخاين دلوقتي أكيد بيراقبّنا وبيسمع كل كلمة بنقولها.
سمر بلعت ريقها، وأدهم انتبه.
مدير المخابرات كمل
وعشان كده المهمة دي هتبقى مسؤوليتك يا ياسين.
ياسين لمجرد سماع اسمه اتجمد.
فتح بقه وقال بصوت عالي متلخبط
مين؟! أنا؟! لا والله لسه متعشي!
معتز ضحك ضحكة مكتومة، ونهى بصت للأرض تخبي ابتسامتها، وأدهم رفع إيده على وشه كأنه بيمنع الضحك بالعافية.
مدير المخابرات بص له بحدة
إنت بتقول إيه يا بيه؟
ياسين اتعدل في وقفته
لا ولا حاجة فندم بس بس كمل حضرتك.
وبصوت منخفض وهو بيبص للي حواليه
انتو بس بتنفخونا وخلاص
ضحكة صغيرة خرجت من سمر، وجاكلين رفعت حواجبها باستغراب على خفة دمه.
مدير المخابرات رجّع تركيزهم
المهمة صعبة والخاين قريب جدًا مننا وعشان نعرفه لازم كل واحد فيكم يلعب الدور اللي عليه.
رفع عينه للشاشة
من اللحظة دي إحنا مش فريق واحد بس إحنا طعم بيستدرج الفريسة
سمر همست
والفريسة هي الخاين.
جاكلين ردت بكل ثقة
والخاين أقرب مما تتخيلوا.
وهنا بدأت اللعبة رسميًا.
اقرأ قصة مهمة في عنبر 14 الجزء الأول من هنا
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
[…] […]
متألقة يا كاتبتي يخليلي المبدعة ❤️❤️❤️
استمري وانا معك هادعمك وجنبك لتوصلي للمكان يلي بتحبيه يا افضل كاتبة ❤️❤️❤️❤️
يخليلي ياك