رواية مهمة في عنبر 14
مهمة في عنبر 14
رواية مهمة في عنبر 14 أدهم وسمر غموض وتشويق
عاد أدهم وجاكلين إلى المكتب والهواء في المكان كان مشحون بطبقات من التوتر واليقظة
في اللحظة نفسها ظهر ياسين واقف عند الباب وملامحه فيها نظرة ترقب وسمر واقفة جنبه بتحاول تخفي اضطرابها ونهى بتلمح بعينيها إنها فاهمة إن فيه حاجة كبيرة قربت تتكشف
أدهم وقف في نص المكتب وكأنه بيجمع الخيوط اللي كانت متفرقة من أول لحظة بدأت فيها القضية
رفع الورق قدامه ونظر لياسين ثم لسمر ونهى ثم جاكلين اللي وقفت جنبه من غير ما تتكلم
قال بصوت هادي لكنه كان واضح إنه وصل للنقطة اللي كانوا بيدوروا عليها
احنا طول الوقت كنا بندور في دواير والكل كان شايف إن الخاين برا الجهاز لكن الحقيقة كانت مخبية في كلمة واحدة ض نيل افتكرناها رمز أو كود أو اسم مكان
لكن لما جمعنا البيانات وفكينا ترتيب الشفرات لقينا إن ض نيل مش مجرد كلمة دي اختصار لجملة ضحية النيل
والضحية دي مش شخص الضحية كانت بلد كاملة بيحاولوا يضربوها من جوه
سمر قربت بخطوة وقالت بصوت ثابت
واللي بدأ الضرب ده معتز كان بيستخدم الشفرة دي في كل عمليات التواصل بينه وبين المجموعة اللي شغالة ضده كان فاكر إننا مش هنفهم بس احنا فهمنا كل حاجة
نهى طلعت ملف صغير من شنطتها وحطته على المكتب
وفردتهم قدامهم
الخيوط كلها رجعت لنقطة واحدة معتز كان بيستخدمنا كغطاء وكان بيوجه ضرباته من قلب الجهاز وكل تحركاته كانت بتتسجل باسم ض نيل
ياسين رفع حاجبه وهو بيبص لأدهم
يعني احنا كده وصلنا للحقيقة كاملة
أدهم رد وهو بيقرب من اللوحة اللي عليها كل الصور والخرائط احنا كده فكينا آخر خيط وفهمنا السر اللي كان مستخبي ورا ض نيل وفاضل إننا نطلع نجيب اللي خان جهازه وخان بلده وخانكم كلكم قبل ده كله
جاكلين قالت بخفة وهي بتقرب منهم
واللي خان قلوب ناس كانت شايفاه صاحب وأخ
لازم يدفع التمن
سمر بصت لها ولأدهم ثم لياسين وقالت
خلصت اللعبة وابتدى وقت الحساب والمرة دي إحنا اللي ماسكين الشفرة مش هو
خرج أدهم وسمر وياسين وجاكلين ونهى بسرعة من المكتب بعد ما اكتملت الخطة في لحظة واحدة
المدينة كانت بتغرق في ضباب خفيف والهواء فيه ريحة مطر أول الليل السيارات اتحركت في موكب واحد مفيش كلمة زيادة مفيش صوت بس عيونهم كانت بتتكلم
وصلوا للمخزن القديم اللي كل الخيوط كانت بتدل عليه
معتز كان مستخبي جواه ولا كان متوقع إنهم يوصلوا بالشكل ده ولا بالسرعة دي أدهم نزل من العربية بخطوات ثابتة سمر وراه جاكلين وياسين ونهى من الناحية التانية
اتقفل المكان عليهم وكأن القدر بيقول إن النهاية خلاص وصلت
معتز كان واقف في نص المخزن مصدوم؛ مرتبك؛ إيده بتترعش وصوته اتكسر وهو بيقول
انتم ازاي وصلتوا
أدهم قرب منه ورغم غضبه كان صوته هادي
الغلط لما يبقى من جوه بيبقى واضح مهما اتخفي
انت كنت فاكر نفسك أذكى مننا بس نسيّت إن اللي بيتاجر بخيانة بلده عمره ما يكسب
معتز بص لسمر وعينيه كلها خوف سمر رفعت راسها مافيش كره مافيش ضعف بس انكسار نضيف من الجرح وقالت
ماكنتش مستني إنك تكون الخاين بس واضح إن الوهم اللي بعتهولي كان أنضف حاجة عملتها في حياتك
ياسين مسك إيد المعتز بسرعة والقيد اتقفل عليه
نهى قالت بصوت واضح
أنت متهم بخيانة الجهاز والوطن وبتهديد أمن البلد
وبخيانة أصحابك اللي شالوك فوق راسهم
جاكلين قربت بخطوتين وبصت له بحدة
وعلى فكرة مهما كنت شاطر في الهروب
في النهاية الطريدة بتقع لما الصيادين يكونوا من نار
أدهم رفع المعتز من دراعه وقال
اللعبة خلصت واللي اتعمل هيتحسب ودلوقتي هترجع وتتواجه مع كل اللي هربت منه
سمر واقفة بعيد بس عيونها ماكانتشي بتتحرك عنه مش شماتة ولا حزن كانت لحظة إدراك إن الوهم وقع والحقيقة اتكشفت والعدالة خدت أول خطوة خرجوا من المخزن
المطر بدأ ينزل والنور الخافت وقع على وش المعتز
ومافيش حاجة حواليه غير صوت القيد في إيده وصوت خطواتهم وكل خطوة كانت بتقول
الخاين وقع
مهمة في عنبر14: غرفة التحقيق
رجعوا الجهاز بعد القبض عليه الرواق كان ساكت بس السكات كان فيه هيبة رجالة الأمن واقفين على الجانبين ومعتز ماشي بينهم وشه شاحب وملامحه أول مرة تبان عليها الضعف الحقيقي دخلوا به غرفة التحقيق ضوء أصفر خافت طاولة معدنية كرسيين وصوت تكة باب بيتقفل من وراهم
بعد دقايق دخل القائد واقف قدامهم بكل فخر إيده مربوطة ورا ضهره وعينيه لامعة
وقال
مين بقا اللي هيستجوبه
الكل بص لبعض جاكلين بصوت منخفض
المفروض حد بعيد عنه
ياسين عض شفايفه بقلق
ونهى رفعت حاجبها
لكن قبل أي حد ما يتكلم خرج صوت سمر واثق هادئ
لا بيرتعش ولا بيخاف
وقالت
انا
الكل اتصدم القائد نفسه اتفاجئ ياسين بص لها بنظرة فيها وجع مش من غيرته من الخنجر اللي اتغرز فيها أصلا
لكن لما سمر رفعت راسها وكملت كلامها
بجرأة وبقلب ثابت
وكررت
انا يا فندم
ابتسامة صغيرة اتحركت على وش ياسين كانت ابتسامة راحة مش لأن القرار سهل لكن لأنه عرف إنها خلاص وقفت على رجليها ورفضت تكون ضحية
القائد هز راسه بإعجاب
تمام يا سمر
بس انتي أكتر واحدة قريبة من القضية هل تقدري تكوني ثابتة
سمر وقفت قدام المراية اللي في سلم الغرفة زي اللي بيراجع نفسه وبعدين بصتله بثبات
انا اكتر واحدة مجروحة منه واكتر واحدة مش هتخلّيه يفلت من اللي عمله
القائد أشار للجميع بالخروج ومافضلتش غير سمر ومعتز
اتقفل الباب والمواجهة بدأت مفيش هروب مفيش تمثيل
ولا خداع معتز رفع عينه عليها وشاف أول مرة إن البنت اللي لعب بيها هي الشخص الوحيد اللي هيحاسبه صح
مهمة في عنبر14: التحقيق بين سمر ومعتز
دخلت سمر غرفة التحقيق بعد ما خرج الكل خطواتها كانت ثابتة نَفَسها هادي وعيونها متحدّة قدامها معتز قاعد إيده مربوطة وظهره متكئ على الكرسي بس لأول مرة ملامحه مش متحدية لأ كانت مكسورة وبتحاول تخفي رعبها
سمر سحبت الكرسي وقعدت قصاده ما قالتش كلمة
سكتت وسابت الصمت يلف المكان الصمت ساعات أقوى من أي سؤال معتز اتضايق من الهدوء هز رجله بعصبية
وبصوت مكسور قال
كنتِ لازم تبعتي حد غيرك
ردّت سمر بنفس الثبات
حد غيري؟ وانت خنت مين؟ البلد؟ ولا الناس اللي صدقوك؟ ولا أنا؟
معتز حاول يهرب بنظره لكن صوتها رجّعه سمر كمّلت
انت فاكر الهروب هيخليك كبير؟ ولا فاكر الخيانة بطولة؟
معتز اتنفس بحدّة
وقال
انا ماخنتش انا كنت مضطر
سمر مالت لقدّامه
وقالت
المضطر ينقذ مش يبيع المضطر يحارب مش يسلّم مفاتيح البلد لعدوها
رأسه وقع لتحت كأن الكلام غسل آخر نقطة كبرياء عنده
قول اللي حصل من أول خطوة لآخر رسالة إمتى اتواصلت معاهم وإمتى قررت تبيع جهازك وقبلهم أصحابك
معتز رفع عينه ونبرة انهزام في صوته
وانتِ؟ ليه انت اللي هنا؟
سمر ردّت بوضوح
عشان انا أكتر واحدة من حقها تسمع وأكتر واحدة مش هتسيبك تهرب بالكلام ولا بالخوف ولا بالندم
معتز ابتلع ريق وقال أخيرًا هما هددوني قالولي يقتلوا أختي الصغيرة وانا…انا خفت والخوف عماني عن كل حاجة
سمر هزت راسها ببطء مش تبرير لكن اعتراف مهم
وقالت
لو كنت جيت قلتلنا كان زمان اختك هنا دلوقتي متطمنة
وانت واقف مكانك مش محبوس ولا مُهان
معتز دموعه اتحبست
كل ده راح
سمر قامت ووقفت قصاده بصت له بقوة
فيه ثمن وفيه حساب وانت هتدفعه للبلد ولينا ولنفسك قبل أي حد
رجعت للباب فتحت لقيت القائد وياسين وأدهم واقفين مستنيين اللحظة قالت بصوت ثابت
اعترف بكل حاجة هاتوا باقي الفريق هنكمّل الخيوط
القائد هز رأسه فخرًا أدهم بص لها باحترام ونهى مسحت دمعة صغيرة نزلت من التأثر وياسين ابتسم ابتسامة فيها فخر وفضل واقف مستنيها تطلع كأنها خرجت من ساحة معركة وانتصرت
مهمة في عنبر 14: تفكيك الشبكة وبداية النهاية
خرجت سمر من غرفة التحقيق بخطوات قوية مش زي اللي دخلت دي كانت خطوة شخص واجه خوفه وواجه غدر عمره وخرج أقوى
أدهم قرب منها صوته واطي لكنه ثابت
عملتيها يا سمر وفوق ما حد توقع
سمر رفعت عينيها
لسه بدري إحنا خدنا أول خيط ودلوقتي هنلم الشبكة كلها
ياسين وقف جمبها وملامحه فيها خليط غريب فخر بيها
وغيرة بسيطة ووجع لأنه شايفها موجوعة وقال بنبرة فيها خفة دم خففت الجو
انا قولت من زمان انتي خطر؛ خطر على الشبكات وخطر على القلوب برضو
سمر رمقته بنص ابتسامة اللي بتظهر بس لما تبقى مكسورة نصين وقال أدهم
يلا بينا القائد مستني يكمل الخطة
داخل غرفة العمليات الشاشة الكبيرة اتملت بخطوط اتصالات تسجيلات وتحركات الشبكة اللي كان معتز جزء منها القائد وقف قدامهم وقال
اعتراف معتز فتح باب بس لسه في بابين مقفولين ولو فتحناهم الشبكة تتفك والعدو يقع
جاكلين عدّلت السماعة اللي على ودنها وقالت
الإحداثيات اللي ذكرها معتز متربطة مع اتصالات جت من الحدود الغربية فيه شخص اسمه ض نيل هو الرابط بين كل ده
سمر قربت الحروف دي كانت في آخر رسالة خرجت قبل ما معتز يهرب ض نيل ده كود مش اسم
نهى قالت
كود لإيه بس الموضوع أكبر من أشخاص ده كأنه موقع
أو نقطة تسليم
جاكلين بدأت تشتغل على الجهاز
وسحبت الخيوط واحدة وراء التانية لحد ما ظهر قدامهم نموذج نهر النيل وفيه نقط ضوئية متصلة
سمر قالت
ض نيل
ض
يعني ضفة
نيل
يعني نقطة على النيل
مكان
نقطة تواصل
أو مخبأ
ياسين ضرب كفه في الطاولة يعني كل شغلهم بيتم على ضفاف النيل والعمليات بتبدأ من هناك
أدهم بص للقائد
اذن نحدد أقرب نقطة وننطلق
القائد وافق وجهز قوة كاملة للتحرك قبل التحرك وقفوا كلهم قدام باب الخروج سمر خدت نفس طويل
ياسين بص لها وقال
جاهزة؟
ردت
جاهزين بس المرادي مش بس علشان البلد علشان نرجع حق كل حد اتخان وحق كل دم كان هيضيع
أدهم لمس كتفها بخفة
ولسه كلامك عن الفار في دماغي والفريسة المرادي
هي اللي هتتصاد لأول مرة
جاكلين ضحكت بخفة وبصت لأدهم
كبرت قوي من ساعة النسكافية انت
أدهم غمز
وانتي اللي مربياني
القائد رفع إيده بإشارة البدء وخرجوا جاهزين للمعركة اللي جاية المعركة اللي هتحدد مصير البلد ومصيرهم هما كمان
مهمة في عنبر14: عملية ض نيل والنصر
تحرك الفريق في عربيات سوداء مغلقة ضوء الفجر كان بيشق السما وانعكاسه على النيل عامل لمعة غامضة
كأن الميّة نفسها مستنية اللحظة القائد بص في السماعة
الهدف قدامكم نقطة ض نيل أكبر مخبأ منظمة معادية اشتغلوا عليه
أدهم مسك سلاحه واتنفس بتركيز جاكلين كانت بتجهز أكواد الاختراق نهى بتراجع خط سير الهروب ياسين على أهبّة الاستعداد وسمر كانت واقفة في مقدمة القارب وشعرها بيتحرك مع الهواء وعيونها موجهة للموقع
كأنها شايفة الخيانة قدامها ومحدش هيوقفها
وصولهم للنقطة ظهر المبنى القديم على ضفة النيل إضاءات خافتة حراسة مشددة وصمت قاتل
القائد قال
على إشارتي اقتحموا
ثلاث
اتنين
واحد
الاقتحام صوت دخان صوت خطوات بتجري طلقات نور صفارات إنذار وصرخات من جوه المكان
أدهم وجاكلين دخلوا من اليمين نهى تغلغلت من الجهة الخلفية سمر وياسين اقتحموا الباب الرئيسي والأرض تحتهم كانت بترج واحد من أفراد المنظمة صرخ إزاي لقونا
إزاي فكّوا الشفرة ياسين رد وهو بيطلق نار تحذيري
اللي عندنا أذكى منكم كلّكم سمر اقتحمت غرفة العمليات
لقيت الملفات الخرائط خطوط الاتصالات كل شبكة العدو مكشوفة قدامها ووقف قائد العدو رجل ضخم
عينه سودا مليانة حقد
عمركم ما هتفوزوا لسه عندي رجال أكتر من اللي تتخيلوه
سمر رفعت مسدسها
بس الخاين بتاعكم وقع واعترف وبدماغه انتهت لعبتكم
قبل ما يتحرك كان ياسين داخل من ورى الستارة ورمى عليه قنبلة صوتية أفقدته توازنه وقع على الأرض
وتمت السيطرة عليه خلال ثواني
جاكلين صرخت عبر اللاسلكي
كل الأهداف تحت السيطرة المنظمة سقطت
نهى
الملفات كلها عندي مفيش مكان مش متسجل
أدهم
يا فندم نقطة ض نيل اتحررت
رجوع الفريق وقفوا قدام المقر والفجر اتحول لشمس كاملة
النيل وراهم وبيبرق كأن البلد بنفسها بتسقف القائد خرج ليهم ووشه لأول مرة ابتسم ابتسامة نصر
وقال
شغل نظيف؛ نضيف بمعنى الكلمة مصر كسبت النهارده
وكسبت بيكم
ياسين ضرب كتف أدهم بخفة
شايف يا عم
احنا مش بس طعم للفريسة احنا اللي اصطدنا الشبكة كلها
جاكلين ضحكت
ولو مشينا على نفس النظام هنصطادهم بسلاكه السنان
أدهم بص لسمر سكت ثواني
عملتي اللي محدش قدر يعمله مش بس انتصار ده رد اعتبار لكل اللي اتخان
سمر ابتسمت ابتسامة خفيفة لكن فيها راحة
النصر مش لحد فينا النصر للبلد والبلد تستاهل
وقفت الشمس على وشهم والنيل بيجري وراهم كأن مصر نفسها بتقول
النصر لكم
مهمة في عنبر14: الفرح الجماعي
مرّت أسابيع بعد عملية ض نيل الجهاز كله كان في حالة احتفال مش بس بالنصر لكن بعودة الروح وبداية حياة جديدة لناس استحقت تكون سعيدة وفي ساحة كبيرة في نادي ضباط الأمن اتعلق الزينة وارتفع صوت الموسيقى
والضحك كان مالي المكان يوم مختلف يوم فرح جماعي
يوم وِعد لحياة جديدة بعد حرب طويلة
الفرح الجماعي أدهم كان واقف لابس بدلته الرسمية
واقف قدام جاكلين اللي كانت لابسة فستان بسيط لكنه خاطف ضحكت وقالت
عمري ما تخيلت اتجوز وأنا شايلة سماعات أمن قومي
أدهم ضحك وهو بيعدل ربطة عنقه
وانا عمري ما تخيلت ان قلبي يقع ف حب حد يهددني كل يوم بالترحيل
جاكلين ضربته بخفة
ولا انا يابني ده أنا اللي مستحملة نرفزتك
وبينهم ضحكة من القلب ضحكة فيها كل اللي عدى
وبالقرب منهم سمر واقفة فستانها هادي نظراتها ماشية على الناس حواليها لكن قلبها ثابت بطريقة أول مرة في حياتها ياسين جه من وراها لبس بدلته كأنه خارج من فيلم
وقال بلهجة خفيفة
مش قولتلك الحب هييجي لحد عندك بصي حواليكي يا سمر ده يوم فرحنا
سمر بصت له بعينيها اللي دايمًا بتخبي كتير
وقالت
وانت جاهز؟
ياسين رفع حاجبه
جاهز ولو على حياتي دمّريها بس اديني فرصة أعيشها معاك
سمر ضحكت نص الضحكة اللي بيحبها
وقالت
يبقى نكمّل
وارتفع زغاريد واتنقلت الأنوار وتشابكت الإيدين
وبقى فيه فرحين لا اتنين في واحد ياسين وسمر
وأدهم وجاكلين والليلة بقت فرحة وطن وفرحة قلوب
وفي ركن بعيد عن الضوضاء كانت نهى واقفة بصمت
بتراقب أصحابها وهُم بيبدأوا حياتهم وبتحاول تخفي حاجة في عينها فرح ووجع وإحساس بالوحدة
بس هي بتبتسم وفجأة ظهر راجل خلفها خطواته هادية
وحضوره غريب كأنه مش من المكان ولا من الليلة
وقال بصوت منخفض
مُبارك لصحابِك يا سيادة الرائد نهى
نهى التفتت بسرعة تفاجئت
إنت؟!
هو وقف قدامها مش معروف لا من الجهاز ولا من الضيوف
ولا من أي مكان عينيه كانت ثابتة وكلامه هادي بشكل غريب
مش مهم مين المهم إني جيت
نهى رفعت حاجبها نبرة صوتها اتغيرت وبرغم هدوءها
كان جواها إنذار
مش كل اللي جاي في الوقت بيكون صح
هو ابتسم ابتسامة صغيرة مليانة أسرار
صحيح بس ساعات اللي بييجي متأخر بيكون بداية جديدة
نهى حسّت بقشعريرة وبصت للفرح وبعدين له
وبينهم لحظة صمت على فرح وانتصار وباب جديد اتفتح
تمت بحمدالله نهاية الجزء الأول
وانتظروني في الجزء الثاني قريبًا
للكاتبة صباح البغدادي
اقرا قصة مهمة في عنبر 14 الجزء الخامس من هنا
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
مبدعة دائما
تسلملي♡♡♡♡
الله تحفة ونهاية جميلة جدا استمري يا افضل كاتبة بالعالم وهاستنى باقي الاسكريبات الجميلة منك يا مبدعة ❤️❤️❤️
يخليلي لبب وحكياته إن شاءلله قريبًا