المقارنة

المقارنة

المقارنة: مقارنة الأهل

المقارنة في حياتنا بمثابة مرض وراثي بيتنقل من غير ما نحس وغالبا بييجي من أقرب الناس لينا الأهل شوف ابن خالك نجح وجاب مجموع كام شوف ابن عمك سبقك بخطوة شوفي بنت خالتك اتجوزت قبلك وانتي لسه قاعدة وكأن الحياة سباق واحد وخط نهاية واحد وكأن القلوب مش بتتعب والظروف مش بتختلف والمشاعر مش بتوجع المقارنات دي مش حافز زي ما ناس كتير فاكرة دي هدم بطيء إحباط صامت بيكسر النفس من غير صوت وبيزرع جوه الشخص شعور إنه دايما أقل حتى وهو بيحاول وبيتعب وبيعمل اللي عليه يمكن أكتر من غيره بس بطريقته هو وبظروفه هو؛ التحفيز الحقيقي عمره ما كان بالمقارنة ولا بالكسر الأولاد والناس كلها بتحتاج كلمة طيبة بتحتاج حد يقول ذاكر عشان تنجح وتحقق اللي نفسك فيه مش عشان تبقى نسخة من حد تاني اجتهد وربنا هيكرمك لأن لكل مجتهد نصيب مش لأنك لازم تطلع زي فلان أو تعملي زي علانة

المقارنة: بين الحجاب وغير الحجاب

شوفي دي لابسة إيه وبشعرها باين دي متبرجة؛ وعكسها واحدة لابسة بنطلون وبشعرها وتقول يا رب اهديني وأبقى زيهم؛ دي مش مقارنة دي نفوس بتعكس اللي جواها؛ في فئة من المحجبات بتنتقد بشكل غلط وكأنها ضمنت الجنة لمجرد الشكل ونسيت إن الهداية رزق وإن القلوب لها أسرار محدش يعرفها غير ربنا؛ وفي فئة من البنات غير المحجبات نفسهم يلبسوا الحجاب اللي يرضي الله ورسوله وقلوبهم مليانة نية صادقة وخجل من التقصير وسعي حقيقي للتغيير؛ ربنا وحده اللي عالم باللي جوه النفوس عالم بالنية قبل الشكل وبالصدق قبل المظهر؛ كل الناس فيها خير وشر مفيش حد ملاك ولا حد شيطان؛ بس الخير لما يتعمل وسط شر بيبان أكتر ويفرق أكتر؛ خليكم دايما مع الصح حتى لو مليون واحد ماشي غلط وحتى لو حسيت إنك لوحدك؛ الحق عمره ما كان بكثرة الناس ولا بالمظاهر؛ الحق كان دايما في القلب اللي بيخاف ربنا وبيحاول يقرب حتى وهو لسه في الطريق

المقارنة:مقارنة الأحمال

أكتر جملة مكروهة في قاموس المقارنات هي؛ أنا بعمل كده ومش بتعب؛ جملة ظاهرها قوة وباطنها قسوة لأنها بتلغي تعب غيرك وكأن الإحساس بالوجع بقى تهمة؛ في نماذج كتير في الحياة متعبة واحدة مثلا تشتكي من نزولها كل يوم السوق تلاقي اللي قدامها يرد ما أنا بنزل كل يوم ومش بتعب بطلي دلع؛ هو فين الدلع في إن حد يعترف بتعبه؛ هل مجرد إنك بتعملي نفس الحاجة وغيرك تعبان يبقى هو مدلل؛ طب حتى افتكروا كلام ربنا  وَلَا نُكَلِّفُ نَفْسًا إِلَّا وُسْعَهَا ۖ  ؛ ربنا موزع الأرزاق مش بس في الفلوس كمان في الصحة وفي قوة الاحتمال وفي الطاقة وفي النفس الطويل؛ مش معنى إنك قدرتي تعملي حاجة يبقى لازم كل الناس تقدر عليها؛ ومش معنى إنك شايل الحمل بسهولة يبقى الحمل خفيف على غيرك؛ إنتي أو إنت قدرتوا تكفوا طلبات البيت والشغل والسوق والغسيل والدروس وكل المسؤوليات؛ ده لا يديكم حق تحكموا على اللي قدامكم؛ ولا يفرض عليه يشيل نفس الحمل بنفس القوة؛ دي أفكار مسمومة بتكسر النفوس قبل ما تبني البيوت؛ كل واحد فينا متشال على قد؛ وكل قلب له طاقته وحدوده؛ والرحمة مش في إننا نقارن؛ الرحمة الحقيقية إننا نصدق تعب بعض ونخفف عن بعض مش نزود الحمل فوق الحمل

المقارنة: مقارنة الزواج

أي إنجاز إنك اتجوزتي بدري عن أختك أو صحبتك أو جارتك؛ وكأن الزواج سباق وكأن العمر أرقام وكأن القيمة بتتقاس بتاريخ عقد؛ الحقيقة إن الجواز في حد ذاته مش بطولة ولا ميدالية؛ الحيوانات نفسها بتتزوج وبتنجب؛ الإنجاز الحقيقي هو الوعي والرحمة وتحمل المسؤولية مش مجرد حدوث الزواج؛ المقارنات في الحاجات اللي ربنا بيقسمها أكبر غلط وجهل؛ لأنها أرزاق؛ رزق ممكن يتاخد في الدنيا وممكن يتأخر أو يكون في الآخرة؛ الجواز مكتوب؛ وعدم الجواز مكتوب برضه؛ وفي بنات وشباب كتير ماتوا من غير ما يتجوزوا؛ وسمعوا قبلها ألف مرة؛ امتى هتتجوز؛ امتى هتتجوزي؛ وماتوا؛ يعني ببساطة ما كانش ليهم نصيب في الدنيا ده مش نقص ولا عيب ولا فشل ده قدر والقدر عمره ما كان مقياس قيمة الإنسان ولا دليل حب ربنا لعبده أو غضبه عليه؛ محتاجين نفتح أفقنا ونفكر بعقل أهدى ونفس أوسع الخلفة بتاعة ربنا؛ والذرية رزق بيتوزع بحكمة مش بمقارنات؛ والناس محتاجة وعي أكتر ورحمة أكتر؛ وتقرا في الدين بقلب فاهم مش لسان بيقارن؛ سيبوا الأرزاق لأصحابها؛ وسيبو الحساب لربنا؛ وافتكروا دايما؛ اللي ما جاش لحد دلوقتي؛ مش متأخر؛ هو بس لسه ما كتبش وقته

مقارنة:مقارنة معايير الجمال

مين قال إن مقياس الجمال في البياض؛ ومين حدد؛ المعايير دي أصلا؛ وكأن الجمال قانون ثابت له شكل واحد ولون واحد؛ الحقيقة إن كل شخص له جماله الخاص؛ له رونقه المختلف؛ اللي ما يتكررش؛ جمال مش مستورد ولا متفصّل على مزاج الناس؛ مين قال إن العيون الملونة هي مقياس الجمال؛ وفي عيون بني فيها سحر يحكي حكايات نظرة منها تهزم ألف لون؛ وتخطف القلب من غير استئذان؛ الجمال مش في لون بشرة ولا في لون عين؛ الجمال في الروح؛ في الضحكة الصافية؛ في الطيبة؛ في الخجل؛ في الحضور اللي يسبق الشكل؛ روحك هي مرآة شكلك؛ ولو روحك حلوة؛ ملامحك كلها بتنور؛ وحتى العيوب بتتحول لعلامات تميّز؛ ابعدوا عن المقارنات؛ لأن الجمال الحقيقي؛ مش بيحتاج منافسة؛ هو بس محتاج قبول؛ وثقة؛ وإن كل واحد يعترف؛ إنه جميل بطريقته

المقارنة: وأخيرًا مسك الختام

لو شايف إنك ما حققتش حاجة السنة دي فكر تاني واهدَ مع نفسك شوية؛ مش كل إنجاز بيتشاف ومش كل تعب ليه شهادة؛ يمكن اللي حققته كان جواك مش براك؛ يمكن اتعلمت الصبر بعد ما كنت مستعجل؛ وكبرت شوية في تفكيرك بعد ما كنت بتزعل بسرعة؛ عدّيت مواقف كانت كفيلة تكسر غيرك بس إنت كملت؛ فهمت نفسك أكتر وبقيت أهدى وأوعى وأقرب لروحك وده في حد ذاته أكبر مكسب؛ مش كل إنجاز لازم يبقى رقم أو منصب أو شغل جديد؛ في إنجاز اسمه أنا وقفت على رجلي تاني بعد ما وقعت؛ وفي إنجاز اسمه لسه بكمل رغم التعب والضغط والوحدة؛ السنة دي يمكن ما كانتش مثالية؛ يمكن خيبت توقعاتك؛ بس كانت خطوة لقدّام حتى لو الخطوة كانت تقيلة؛ افتكر دايما إن ربنا بيجهزك في الخفا؛ حتى وإنت مش واخد بالك؛ وبيعلّمك ويقوّيك وبيهيأ قلبك للي جاي؛ اطمّن؛ اللي جاي هيكون أحن؛ والتعب مش ضايع؛ وربنا عمره ما بيكسر بخاطر حد صبر؛ بإذن الله السنة الجاية تحمل ليك سلام أكتر وفرحة أصدق ونهاية تليق بكل اللي استحملتوه…!

اقرا قصة سمكة وثلاث عيون من هنا