مغامرات بسنت
المشهد الأول
بقلم/ دينا الحمزاوي
_ايوا برضوا مش فاهم حضرتك عايزة مني ايه دلوقتي؟؟
قالي الجملة دي صاحب محل اللبس اللي دخلته، أسأله عن نوع جاكت كنت عايزاه.
_الله ما بقولك عايزة كتكوت يا جدع انت مش بتفهم.
قولتهاله بنرفزة: يا ستير على الغباء، بيرضع ايه ده؟؟
_حضرتك احنا هنا محل بيع ملابس، كتكوت ايه بس اللي عايزاه هنا؟؟؟
اقسم بالله شكله غبي وهيقرفني معاه.
_ايوه ما هو بيتباع هنا حتى بالإمارة، اسمه ترانش كتكوت.
لقيته رفع طرف شفايفه كده وهو بيقولي بتشنج:
_ايوه انا ايه اللي يخليني ابيع كتكوت وكمان اسمه ترانش!!
نفخت بضيق وبابعد من وش الغبي ده وببص حوالي لحد ما عيوني الجميلة زيي وقعت على الترانش كتكوت اللي عايزاه، شاورت عليه وقلتله بطفولية:
_اهو هو ده الترانش كتكوت اللي أنا عايزاه عشان تعرف انك جاهل، قال مش بتبيع ترانش كتكوت قال!
لقيته بص على الترانش كتكوت وهو متنح كده شوية تقريباً من أثر الصدمة وكده، يعني أنه طلع غبي وميعرفش أنه بيبيعه، راح رفع صباعه كده وهو بيشاور عليه وقال وهو لسه متنح:
مغامرات بسنت
المشهد الثاني
بقلم/دينا الحمزاوي
_بذمتك ودينك يا شيخة، ده اسمه ترانش كتكوت؟؟؟
رديت عليه وانا ببص على الترانش كتكوت ببلاهة:
_ايوه، ترانش كتكوت.
لقيته زعق بعصبية وهو بيهز الترانش كتكوت:
_الترانش كوت بقى اسمه ترانش كتكوت؟؟؟
بصيت على الترانش كتكوت بعدين بصيت للراجل بقرف كده وقلتوله:
_فرقت اوي يعني، ماهي هي بعدين مدلعهوش يعني؟؟؟ يرضيك اقول عليه ترانش كوت حاف كده؟؟؟
_لا ميرضنيش، بس عادي تفقعي مرارتي وترفعيلي الضغط والسكر صح؟؟؟
_اه عاتشي براحتي.
لقيته بصلي بقرف وقال:
_سعره 750 جنيه.
_750 عفريت أما ينططوك، هما 250 جنيه ومش هدفع أكثر من كده، قال 750 قال عايز ينصب عليّ مفكرني بنت ناس اكمني لابسة الحتة اللي على الحبل.
زعقلي بنفاذ صبر:
_250 جنيه ليه جايبه من الشارع ده، ماركة حضرتك عارفة يعني ايه ماركة!!!
_ماركة دي تبقى امك، أنا هاخده ب250 يعني ب250.
_وانا معنديش لبس للبيع.
المهم بعد نص ساعة كنت ماشية في الشارع وانا ماسكة الشنطة اللي فيها الترانش كتكوت بعد ما طلعت عين الراجل وخليته يكره نفسه وأم اليوم اللي جه فيه على الدنيا، وخدته ب150 جنيه، اومال هينصب عليّ ولا ايه؟؟
ده انا مبقاش بسنت بنت ام بسنت لو مخدتهوش بسعر العملة… أقصد الجملة.
مغامرات بسنت
المشهد الثالث
بقلم/دينا الحمزاوي
المهم بقى وانا ماشية، وقعت عيني على قهوة، روحت قربت وقعدت وسط الرجالة وانا بحط رجل على رجل، لقيتهم كلهم لفوا وبصولي، الله مالهم دول بيبصولي كده؟ أول مرة يشوفوا بنات؟؟؟
بالتأكيد مش أول مرة يشوفوا بنات، بس الأكيد أن أول مرة يشوفوا واحدة مزة كده زيي. يـــــاه، بعشق! امي هتقولوا عليّ نرجسية؟؟ هقولكم حاشة لله طبعاً أنا مغرورة، بس اه والله كده زي ما بقولكم.
المهم قرب مني الواد العبيط بتاع القهوة وقال:
_حضرتك القهوة دي للرجالة.
_ايوه وفيها ايه يعني، مش فاهمة!!
_فيها انها قهوة رجالة، عيب كده، مينفعش تقعدي هنا.
قولتله بعناد:
_لا هقعد، واللي عاجبه عاجبه، واللي مش عاجبه يشد في حواجبه بس كده!
لقيته مسح على وشه ونفخ تقريباً كده، عرف اني مش هتحرك خطوة واحدة.
_طيب تطلبي ايه؟؟
_واحدة آيس كريم.
لقيته بصلي كده بتشنج واضح:
_آيس كريم ايه، لا مؤاخذة، هنا بنبيع مشروبات والحاجات دي.
بصتله بكبرياء:
_اه تمام، فهمت، خلاص عايزة واحد حشيشة تفاح.
فضل يرمش شوية كده بعدم فهم وقال:
_حشيشة تفاح ده يطلع ايه دي؟؟ أنا طول عمري اسمع عن شيشة تفاح.
_ايوه ماهي دي اللي أنا عايزاها.
_هيا الشيشة بقى اسمها حشيشة؟؟؟
_إذا كان عاجبك.
ضرب كف على كف وراح يجبلي طلبي، مش فاهمة ايه الناس دي، هما لسه هيجادلوني؟؟ ما يجيبوا وهما ساكتين حاجة في قمة الرخامة الصراحة.
ــــــــــــــــــــــــــ
مغامرات بسنت
المشهد الرابع
بقلم/دينا الحمزاوي
وانا ماشية في الشارع، عيني وقعت على مطعم كوتشي، طلعت أجري عليه ودخلت، قعدت على أول ترابيزة جات قدامي، جه الواد اللي هيأخد الطلبية، قولتله بابتسامة متحمسة:
_بص عايزة طبق كوتشي كبير ومليان شطة كتير، ها اتوصى بيها متبقاش منتن.
فضل يرمش كده ببلاهة بعدين قالي:
_كوتشي ايه حضرتك!! قصدك كشري؟؟
_اه، مش فاهمة، هو كله ماشي يعلق على كلامي ليه النهاردة، اما ناس غريبة بصحيح!!
_ايوه، ما حضرتك بتقولي عليه كوتشي كوتشي ازاي يعني؟!!
_ازاي؟ زي الميه في الرغيف، زي الكشري في التكييف.
فضل باصصلي وهو بيرمش كتير ورا بعض، مش فاهم، بعدين قالي:
_الميه في الرغيف ازاي؟ وأزاي كشري في التكييف؟؟؟
_زي الناس، انت لسه هتسأل هش يلا هش!
راح يجيب الكشري وانا قاعدة ببص حوالي، لحد ما لقيته جاي عليّ بالكشري، شكرته وانا قاعدة باكل. بعد ما خلصت أكل طلعت كنت تعبت اوي اوي من المشي، اه والله كده زي ما بقولكم.
وصلت البيت، أول ما فتحت الباب ودخلت، لقيت البيت هادي… أول استر! ياللي بتستر من امتى الهدوء ده، بس ياربي؟؟ تقريباً كده في مصيبة.
دخلت على الصالون لقيته فاضي، طلعت البلكونة لقيت أمي قاعدة وجنبها واحدة كده، قاعدين بيشربوا شاي. ماما لفت ليا بعدين بصتلي وابتسمت، غريبة، امي بتبتسم زي الناس!
_تعالي يا بسنت سلمي على طنط أم محمود.
قربت منهم وانا بسلم عليها، وانا اصلا مش عارفة مين دي. لقيت ماما بتقولي:
_روحي يا حبيبتي عشان تشوفي خطيبك.
_خطيب مين، هو انا اتخطبت امتى عبيطة الولية دي ولا ايه؟؟؟؟
_يلا يابت، مالك مبرقالي كده ليه، يلا عشان خطيبك مستنييك في الآوضة جوا.
_ايه؟؟؟؟
يتبع…
استنوا الجزء الثاني هينزل بكرة على صفحتي👀🤍
متنسوش تقراوأ الأسكريبت اللي فات
مصلحة ولا مروحة يومي الأسود في القسم1
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
