جنايات الكرتون: شخصيات ديزني
بقلم/ دينا الحمزاوي
المشهد الأول من شخصيات ديزني
_ دخل المتهمة اللي بتفقعلي مرارتي، قصدي البت الملزقة اللي اسمها سنو وايت، يا عسكري.
كنت أنا قاعدة، أنا مين؟ أنا القاضية دينا الجامدة اللي مفيش مني اتنين يا معاتيه!
احم احم، بهزر بهزر، يخراشي بمـ ـوت في نفسي… لا لا، عيب كده، كفاية حب في نفسي بقى. يلا نرجع لموضوعنا، كنت قاعدة في المحكمة في قضية حكم على المتهمة الأميرة الملزقة “سنو وايت” أو “بياض الثلج”، على حسب ما بتقولوا… إيه إيه؟؟ بتبصولي كده ليه؟؟
انتوا عايزين القاضية دينا تبقى موجودة وتسيب المتهمة الملزقة دي حرة؟
ده على عفاريتشي! احم… خلاص، يلا نكمل. المهم، اتفتح باب القاعة ودخلت منه المتهمة الحقيرة، قصدي الدلوعة «سنو وايت»، لتعليم فقعت المرارة والمرار الطافح.
طبعًا كالعادة، بنفس فستانها المعفن اللي مغيرتهوش من أول الكرتون.
يخرب بيت النتانة! إيه ده بجد، والله يعني أميرة ولابسة نفس الفستان من أول الكرتون… ده حتى الأميرة الشحاتة، قصدي سندريلا، اللي ليها قاعدة تاني خالص لوحدها، غيرت الفستان، مش عيب على «بياض البطيخ» دي متغيرش بتاعها؟؟
وأهو، أول تهمة، إن الهانم بتشجع الأطفال على العفانة… ده حتى النظافة من الإيمان.
اخص سفوخس عليها… احم، مش مهم، منطلعش بره موضوعنا. عارفة إنّي رغاية ورغيت كتير، اعذروني… هيهي.
وقفت قدامي، وركبها بتخبط في بعضها من الرعب… نيهاها، طبيعي، ما هي واقفة قدام فخامة القاضية دينا، أومال.
حمحمت كده، وانا بعدل نفسي وبقولها:
_ أنتِ عارفة سبب وجودك هنا يا اخت بياض البطيخ؟
لقيتها رفعت عيونها البريئة، بملامحها المستفزة اللي بتجبلي جلطة، وقالتلي بصوتها الملزق:
آه… منها بنت الملزقة دي.
فكروني أجيبها من شعرها اللي قد كف إيدي… بس بعد المحكمة، عشان سمعتي كقاضية عسلية.
_ أنا… أنا بريئة والله، معملتش حاجة، أنا كيوت خالص.
_ كيوت في عينك، يابنت الملزقة. أنتِ بالاخص متتكلميش عن الكياتة، يابت. ده أنا لما كنت بسمعك، وأنا عيلة صغيرة، بضفيرتين وأسنان واقعة، كنت أبص لأمي كده وأقولها بالنص: «ماما، البت دي صفرا ومستفزة ومبحبهاش… انثى السنجاب دي».
كده بالحرف، حرفيًا… متصورة يعني إيه، عيلة بشخة تقول كده، أما تسمعك؟ ده أنتِ بتبوظي الأطفال… ده ليلتك معايا مش معدية وفول وطعمية.
_ سجل، يابني، عندك بسم الله… أول قضية:
1- تشجيع الأطفال على المياعة والمياصة وقلة الأدب.
احم، يلا نكمل استجواب الأميرة بطشيخة.
شخصيات ديزني
المشهد الثاني
_ هسألك كام سؤال يا بطيخة، يابنتي، ياريت أجوبة محترمة جبارة كده، ونبطل شغل شحتفة… اشطا؟
_ أوكي.
_ أوكي في عينك يا ملزقة… قولي اشطا.
_ لا، تقيلة عليّ دي… وكلمة بيئة أوي.
شهقت شهقة طويلة… هاتولي يا عيال ملوخية… اشهق فيها بالمرة. بقى بنت بارم ديله دي بتقول على الفاظي «أنا فخامة القاضية دينا بيئة»؟؟
دي ليلة أمها في المهلبية معايا النهاردة.
قولتلها بعصبية وانا رافعة ليها حواجبي:
_ بقى أنا الفاظي بيئة، يابت؟ يا منحرفة، يا بيضة… بياض أوفر جاتك نيلة على شكلك يا بطيخة.
_ أوه ماي جود، مكنش قصدي والله يا طنط… أنا…
برقت بصدمة، وانا بقولها بعصبية:
_ طنط؟؟ طنط مين، ياروح؟ أمك؟؟ ده أنا لسه صغيرة، يا اوختشي… ده أنتِ اللي طنط ده كنت بسمعك وأنا ثلاث سنين قال طنط قال… ولا هو عشان أنتِ مش بتكبري يبقى أنا طنط؟؟
والله، لاضيف عليكِ قضية تاني.
_ ضيف عندك، يا عسكري… قضية رقم 2: البت دي غلطة فيا، أنا حضرت القاضية دينا، ودي جريمة يعاقب عليها القانون الممنون.
نرجع لكلامنا تشاني.
_ احم… طرقت بالمطرقة اللي مش فاهمة إيه فائدتها في الموضوع، وانا بسألها:
_ قوليلي بقى يا صايعة، ازاي يا متربية، ها شدي مئة خط تحت متربية دي، تقعدي في بيت فيه سبع رجالة لوحدك، ها؟
_ وإيه يعني؟ دول أقزام!
_ يختي، هما عشان أقزام؟ يبقى عادي؟؟ برضه عيب يا حبيبتي… الإسم أنهم رجالة، اسمهم إيه؟
_ رجالة.
_ أيوه كده اتلمي. بعدين خدي، تعالي هنا يا واطية… يعني ازاي سمحتي لنفسك تعيشي مع سبعة رجالة، شغالين، وبالغين، وعايشين في وسط غابة بعيد عن البشر، وتقولي: «هعيش معاكم، وأنضف، وأطبخ، وانتوا ناموا»؟ نامت عليكِ حيطة يا بعيدة.
_ دول كانوا طيبين.
_ طيبين؟ طيبين في عينك، يا ولية؟ ده واحد اسمه «غضبان»، والتاني «نعسان»، والثالث «عطشان»… دي أسماء أعراض جانبية مش بني آدمين!
مخوفتيش منهم، يابت؟
_ حسيت بالأمان معاهم.
بعد ردها ده، برقت تاني بصدمة، وانا بضرب على الترابيزة بعصبية وبقولها:
_ أمان؟؟ أمان مين يا أم أمان! مسمعتيش عن المثل اللي بيقولك «نو أمان لأي مان»؟؟
فضلت ترمش كتير كده ببلاهة، بعدين قالتلي:
_ لا، الرجالة هما الأمان.
_ الطــــــم الطـــــم، واجيب ناس تلطـــم! روحي يا بعيدة، منك لله… حسبي الله ونعم الوكيل فيكِ، رفعتيلي الضغط.
شخصيات ديزني
المشهد الثالث من شخصيات ديزني
اتنهدت وانا بمسح على عيني بتعب، بعدين قولتلها:
_ تعالي يا قنبلة الغباء… أنتِ تعالي.
عدلت حجابي، بعدين قولتلها:
_ هو أي حد يديكِ أكل، وبالأخص تفاح، تاخديه منه كده عادي؟؟
_ أيوه، عادي.
_ بت، بت متستفزنيش… عادي ازاي يعني؟؟ ها، انطقي! أمك مكنتش بتقولك وأنتِ صغيرة متاخديش حاجة من حد؟
_ لا.
_ طيب، مقالتلكيش: متفتحيش الباب للغرباء؟؟
_ لا.
_ الله يخرب بيتك، أنتِ وأمك مش عارفة خلفتك ليه لما مش هتعرف تربيكِ!
اتنهدت وانا بحاول افتكر مصايبها التي لا تُعد ولا تُحصى.
_ خدي تعاليلي بقى كده يا قليلة الأدب.
_ خير؟
_ خير! وهييجي منين الخير، يختي؟ وأنتِ بت مش متربية… ازاي تسمحي للأمير قليل الأدب أنه يبوسك وأنتِ في الغيبوبة؟
ها، ازاي؟؟
_ ده بوسة حب حقيقي.
_ حب!! حب إيه يا أم حب، يا فاسقة ها!! ده اسمه تحرش، متحرش… مش متربي… يعني إيه يعني يبوسك… يعني إيه قليل الأدب؟ ده أنا لو شوفته هنفخه.
_ أنا أعترض.
صوت مسرسع كده قال الجملة دي بصوت عالي، ببص على مكان الصوت… لقيته الأمير الصايع ده.
صرخت فيه بغضب:
_ أخرس يا قليل الأدب عشان متتحبسش بدالها.
قعد مكانه، واتلم. قومت أنا بصيت للبت بياض البطيخة دي، رغم أن البطيخة مش بيضة، بس مش مهم.
_ رغم أني مش فاهمة إيه السر في أنه يبوسك وتصحي من الغيبوبة… تبًا للفسق والفجور… بس ماشي، سجل عندك يابني
التهم بالترتيب:
1- تشجيع الأطفال على المياعة والمياصة وقلة الأدب.
2- غلطت فيا أنا، حضرت القاضية دينا.
3- الجلوس في منزل بمفردها مع سبع رجالة أقزام.
4- تبرير التحرش باسم الحب الحقيقي.
5- فقعت مرارة المشاهدين.
6- تشجيع الأطفال على فتح الباب وتناول الطعام من الغرباء.
7- بتعلمهم التلزيق والسهوكة، وأنا أعترض بشدة على ده!
_ فبالتالي، حكمت المحكمة حضوريًا على المتهمة سنو وايت بالسجن لمدة 9 سنين، مع إعادة التربية والتأهيل.
ارفع الستار، يابني.
بس كده يا اخواتشي، كان معكم فخامة القاضية دينا مع سلسلة اسكريبتات محكمة ديزني مع القاضية دينا الحمزاوي، وبعون الله هنعلم كل شخصيات ديزني اللي فقعوا مرارتنا… الأدب!
متنسوش تقراوا الاسكريبت اللي فات
بسنت ومحمود2
انتظروا الجزء الثاني من غلاف سلسلة شخصيات ديزني واكتبولي في الكومنتات مين من شخصيات ديزني تحبوا يكون في الحلقة القادمة 🌚💙
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
