يا أنا يا هو:عيسى وأروى
بقلم/دينا الحمزاوي
المشهد الأول
_ايوه يعني مش هتجيبلي شجرة الكريسماس؟
رد عليّ بكل برود:
_اه
قولتله بعناد:
_بس أنا عايزة شجرة الكريسماس!
قفل الكتاب اللي كان ماسكه بكل عصبية وهو بيبصلي بنظرات نارية:
_وانا قولت مفيش زفت.
قعدت اخبط على الأرض برجلي وانا بقوله بضيق:
_ايوه ليه يعني!!
اتنهد وهو بيمسح على وشه بضيق:
_يا حبيبتي حرام،احنا مالنا احنا بالكريسماس؟، احنا مسلمين،ملناش غير عيدين بس عيد الفطر،وعيد الأضحى، مالنا احنا برأس السنة!!.
فضلت اخبط على الأرض برجلي وانا بقوله بإصرار:
_ مليش دعوة أنا بالمسيحيين أنا عايزاها عشان رأس السنة!
ضرب بايديه على وشه وهو بيقولي بنرفزة:
_يمري هتجلطيني ماهو حرام يابنتي!
_ يعني مش هتجيب الشجرة يا عيسى؟
_ ايوه مش هجيب.
_بقى كده؟
_ايوه كده ده هتعملي إيه يعني؟
_هعيط طبعًا.
قولتله كده وبدأت اعيط فوقف وقرب مني وحط ايده على كتفي وثبتني مكاني وبايده الثانية بدأ يمسح دموعي وهو بيتنهد بضيق:
_يا أروى يا حبيبتي افهميني،حرام احنا مسلمين بلاش الشكليات والتخلف ده يلهيكِ عن دينك يا حبيبي،ده ربنا قال في القرآن «لكم دينكم ولي ديني»، هتكفري على أخر الزمن؟عايزة تدخلي النار؟ وعشان إيه؟ ملهيات الحياة؟.
يا أنا ياهو: عيسى وأروى
المشهد الثاني
بقلم/دينا الحمزاوي
مطيت شفايفي كده باقتناع بعدين قولتله بطفولية:
_ يعني مفيش شجرة كريسماس؟
فضل يرمش شوية كده بصدمة راح قال:
_اقول فيكِ إيه؟اومال أنا يختي كنت ماشي اكلم في أمي؟غوري من وشي اعمليلنا الغداء.
_لا أحنا هناكل بره.
رفع حاجبه كده بعدين قالي:
_نعم يختي؟
_إيه؟بتبصلي كده ليه؟طالما مفيش شجرة كريسماس يبقى ناكل بره.
اتنهد بضيق شكلي كده تقلت عليه بس مش مهم بعدين قالي وهو بيبص في الساعة وقالي:
_عشر دقائق لو ملقتكيش قدامي مفيش خروج.
في وان مينت، حرفيًا كنت اختفيت من قدامه لبست بسرعة وجهزت نفسي وطلعت ليه.
بصلي كده من فوق لتحت بتقييم بعدين قالي:
_لا ضيق الدريس ده شوفي غيره.
_بس
قاطعني وهو بيقول بلهجة حادة:
_من غير بس، انا قولت كلمة وتتنفذ.
نفخت بضيق ودخلت لبست دريس واسع كان باللون الأحمر النبيذي وطرحة بيضاء، وهيلز أبيض، وخدت شنطتي،وطلعت ليه طبعًا بدون ذرة ميك أب ده ينفخني لو عملت كده طبعًا فيه منكم هيقول عليه راجل جاهل،ومتخلف وهو ماله، طبعًا انتوا غلط جوزي مسلم وعارف دينه بيغير على أهل بيته مش ديوث زي ناس تانية هو ده اللي مخليني أحبه، راقي،ومحترم،ادب،واخلاق الله اكبر عليه ربنا يباركلي فيه.
صراحة هو مستحملني في حاجات كتير أوي الله يكون في عونه على ما ابتلاه بس لو مكانش هيستحملني انا هيستحمل مين يعني؟؟.
يا أنا ياهو:عيسى وأروى
المشهد الثالث
بقلم/دينا الحمزاوي
أحم ما علينا المهم طلعت ليه فضل يقيم لبسي بعدين ابتسم وهو بيمد ايديه ليا بحنان يلهوي بحبه يا ناس وربنا.
عينك يا ولية أنتِ وهي من على جوزي شيفاكم وانتوا بتقولوا يابختها بيه نفسنا في واحد زيه بس ده بعينكم أنا جوزي واحد بس ميتكررش أومال!
المهم نرجع لموضوعنا.
ركبنا العربية وروحنا مطعم جميل لذيذ بس انا بصيت على المطعم كده صراحة كان فخم وباين عليه غالي طبعًا ده شيء ميفرقش لجوزي لأننا الحمدلله يعني عيشتنا مرتاحة الحمدلله والشكر ليك يارب.
بس انا مش بحب الأماكن دي!
فضلت ابص حوالينا بعدين قولتله:
_عيسى.
بصلي وهو بيقولي :
_قلبه.
_انا مش عايزة أدخل.
_ليه يا عيوني؟المكان مش عاجبك؟نغيره؟
_لا هو حلو بس مش زوقي تيجي نروح مطعم كشري.
هز رأسه بالموافقة بعدين وقف مكانه بصدمة ولف بص ليا وقالي:
_ايه؟؟؟
_ايه؟
قولتهاله بغباء راح قالي:
_كشري؟،كشري يا أروى؟؟
_ايوه يا اخويا كشري ماله الكشري وحش؟؟
_لا مش وحش بس.
_بلا بس بلا بطيخ يلا.
ركبنا العربية وهو راح عند محل كشري قولتله يطلبلنا وانا هستناه في العربية عشان مش هناكل في المطعم راح وفعلًا بعد نصف ساعة جه ركب وقالي:
_ها يا ستي إيه مخططك لليوم؟
ابتسمت ليه بحماس وقولتله:
_اطلع على الكورنيش بقى.
ابتسم هو كمان وساق العربية لحد ما وصلنا الكورنيش نزلنا وبدأنا نفتح الأكل، وناكل واحنا بنفتكر ذكرياتنا الجميلة لحد ما وصلنا لليوم اللي جه يتقدملي فيه، رجعت رأسي لورا وانا بضحك بشماتة وبفتكر اليوم ده
يا أنا ياهو:عيسى وأروى
المشهد الرابع
بقلم/دينا الحمزاوي
Flach Back :
كنت واقفة قدام ماما وانا عمال ازعق واخبط برجلي بعصبية:
_يا ماما اسمعيني بقولك مش عايزة،مش عايزة اتجوز يا بشـــر ايه اللي مش مفهوم في كلامي؟؟
_اومال عايزة تفضلي قاعدة فوق دماغي كده يا روح امك؟؟
_مش فاهمة أنا وجودي ده مضايقك في ايه بس يا ست الكل!
غوري البسي وجهزي نفسك عشان العريس وأهله كلها ساعة وجايين.
دخلت بضيق وقعدت على السرير اتصلت بصحبتي فردت عليّ وقالتلي:
_خير اللهم اجعله خير بتتصلي ليه؟
_وهو ده رد؟ده بدل ما تقوليلي عاملة إيه؟
_من غير صداع عايزة إيه يا مصيبة؟؟
_احم أنا متقدملي عريس.
_بجد؟واخيرًا حد فينا هيفك النحس!
_بت متنرفزنيش!،انا عايزة اطفشه!
_نعم يختي؟
_نعم الله عليكِ انجزي يابت.
_امـم،طيب اشطا استني ربع ساعة واكون عندك.
_اشطا.
قفلت معاها وانا بتنهد براحة، البت رُقية دي خبرة في تطفيش العِرسان.
فعلًا ربع ساعة وكان الباب بيخبط ودخلت عليّ رُقية صحبتي، قعدت جمبي فأنا اتعدلت وقولتلها ها إيه الخطة؟
لقيتها ابتسمت بخبث وقالتلي:
_اسمعي”………”
وبدأت تقولي ابتسمت بحماس على خطتها، وبعد نصف ساعة أهل العريس جم وأنا كنت جهزت ماما خطبت على الباب، وقالت نطلع أنا كنت طالبة من ماما ادخل عليه على طول نقعد لوحدنا قبل أهله، وبعد إصرار رهيب مني انا ورُقية وافقت المهم طلعت لعريس الغبرة كان قاعد حاطط عينه في الأرض واهلي وأهله في البلكونة.
حمحمت فرفع وشه وانا كنت ماسكة صينية وعليها كوباية قهوة بصلي بعدين تنح وفتح عينه بصدمة ولسه هيرقع بالصوت قومت قربت منه بسرعة وحطيت أيدي على بوقه وقولتله بحدة:
_ولا صوت.
بصلي برعب من منظري كنت لابسة بلوزة صفراء،وجيبة زرقاء وطرحة حمراء كان شكلي يفطس ضحك ولابسة فردة جزمة والتانية فردة شبشب وكله كوم واللي كنت عاملاه في وشي كوم كنت حاطة على وشي بودرة كتير بشكل اوفر وروج احمر فاقع وطالع بره شفايفي اصلًا!
ولينسيز زرقاء بس لونها يخوف ورموش صناعية وداهنة خدودي باللون الاحمر صعب عليّ الصراحة شكله يا عيني ههه يفطس ضحك أكثر مني.
شاورت ليه عشان يقعد وقعدت قدامه حطيت رجل على رجل وانا بقوله:
_متخافش اقعد أنا مش هاكل منك حتة يعني!
قعد ورجله بتخبط في بعض من منظري وسألني:
_انتِ مين؟
قولتله بنبرة صوت غليظة:
_انا عملك الأسود هاهاها.
أما لقيت الملامح الجادة على وشه حمحمت كده وانا عاملة نفسي مكسوفة وبقوله:
_انا العروسة.
فضل يرمش شوية كتير كده وهو عمال يبصلي من فوق لتحت فأنا قولتله بكسوف مصطنع طبعًا:
_يوه بطل تبصلي كتير كده انا بتكسف!
يا أنا ياهو: عيسى وأروى
المشهد الخامس
بقلم/دينا الحمزاوي
رفع طرف شفايفه بسخرية بعدين قعد وحط رجل على رجل وقالي:
_لا حلوة عجبتني الحركة دي مش بطالة.
_ايه مش المفروض تاخد بعضك وتمشي؟
_وامشي ليه؟
_عشان أنا وحشة مثلًا.
قولتهاله بسخرية لقيته ابتسم كده وهو بيقولي:
_لا ماشاء الله عليكِ،قمر عجبتيني.
_بس انت معجبتنيش!
قولتهاله بتحدي فرفع كتفه وهو بيقولي باستفزاز:
_مش مهم.
_هو إيه اللي مش مهم انت نو كرامة خالص؟
_مش هرد عليكِ، قومي بقى زي الشاطرة البسي لبس عدل وامسحي القرف اللي في وشك ده.
_وإن مقومتش؟
_براحتك خلي اهلي واهلك يدخلوا يشوفوكِ بالمنظر ده والله اعلم رد فعل عيلتك هتكون إيه!
مسكت هدومي بتوتر وبعدين قولتله بتحدي:
_وايه يعني مش مهم.
_خلاص أنتِ حُرة.
قالهالي بكل استفزاز اتضايقت منه جدًا، واضطريت أن أنا أقوم بس قبل ما اطلع من الآوضة قولتله:
_تطلع تقولهم أن انا وانت مش مناسبين لبعض عشان متندمش.
وبعدين سبته ومشيت دخلت اوضتي غيرت واول ما طلعت لقيت أهله واهلي قاعدين وبابا بيقول:
_ها اتفقتوا؟
لسه هتكلم لقيت الحيوان قاله بابتسامة واسعة اول ما شافني وتقريبًا كده كان عايز يستفزني:
_اه يا عمي جدًا نقرأ الفاتحة؟
_نقرأ الفاتحة.
قالوا كده وبدأوا يقروا فتحتي وانا واقفة ببص ليهم بصدمة، طيب إزاي؟وليه؟وبدون موافقتي!،وانا مقدرتش اعترض اصلًا!
طيب هو ليه عمل كده؟ده مشافش شكلي!، هيدبس نفسه في واحدة مجنونة زيي ليه؟؟
اتعصبت منه أوي وحلفت أن الأيام اللي جاية دي هخليها سواد على الكل.
بس كده استنوني في البارت الثاني من يوميات أروى وعيسى🌚🎀
بقلم/دينا الحمزاوي 💞
لا تنسوا قراءة الاسكريبت السابق
شخصيات ديزني: جنايات الكرتون1
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
