مصلحة ولا مروحة
يومي الأسود في القسم
بقلم/ دينا الحمزاوي
المشهد الأول
_ مصلحة ولا مروحة ؟
رمالي الكلمتين دول عيل مهزق قليل الأدب مشفش بربع جنيه تربية من عيال الحارة المشردين اتجاهلته وانا بكمل طريقي لقيته وقف قدامي وهو بيسد عني الطريق وبيقولي بطريقته السوقية المعفنة زيه .
_ الله جرا ايه يا مزة مش مالي عينك أنا ولا مش مالي عينك!!
_ أيوه ياروح امك مش مالي عيني وان ما تحركتش من قدامي يلا هقلع اللي في رجلي وانزل بيه على دماغك!
لقيته ضحك كده باستهزاء وهو بيقولي بغمزة :
_ الله الله الله ده القطة طلعت بتخربش! امـ.ـوت أنا في القطط اللي بتخربش!
_ والله انت اللي جبته لنفسك تعالى بقى .
قولتله الكلمتين دول ونزلت قلعت اللي في رجلي ونزلت فيه ضرب على دماغه قليل الأدب ابو عين زايغة اللي مش متربي ده! عيل فاسق وفاجر بلا نيلة!
الناس اتجمعوا علينا في الحارة وحاولوا يبعدوني عنه بالعافية وانا والله ابداً مش هتحرك من مكاني غير لما أعلمه الأدب .
مصلحة ولا مروحة
يومي الأسود في القسم
بقلم/ دينا الحمزاوي
المشهد الثاني
بعد ساعتين كنا واقفين في القسم وانا قاعدة على الكرسي وحاطة رجل على رجل ولا كأن القسم قسم أبويا! لا ولا كأن الواد اللي أنا علمت عليه هو اللي عمل فيا محضر أصلاً!!!
الظابط كان قاعد قدامي وهو بيمسح على وشه بملل وبيقولي :
_ أيوه يعني يا مدام إلهام أنتِ عاوزة إيه دلوقتي أنا مش فاهم!!
_ مدام مين يابو مدام أنا لسه آنسة!
_ خلاص حقك عليَّ يا آنسة إلهام، ها خلصيني بقى عايزة إيه!!
نفخت بضيق من الظابط العبيط ابو كرش مدلدل اللي مرزوع قدامي على المكتب ده وقولتله بمسكنة :
_ أنا عايزة حقي يا بيه!
_ حق إيه ده أنتِ اللي معلمة على الراجل! ده مفيهوش حتة سليمة .
بدأت اعيط وامثل دور المغلوبة على أمرها :
_ يعني يرضيك حضرتك اكون ماشية في الشارع الاقي الكائن الهمجي ده بيتحمرش بيا بدون ولا ذرة حياء ولا خجل؟ ايه معندهوش اخوات بنات؟
_ ايوه يعني عايزة تعملي فيه محضر عدم تعرض يعني ولا ايه مش فاهم أنا!!
_ الله مش انت ظابط!! ما تشوف أنت!
لقيته قالي بعصبية :
_ طيب ما أنتِ اللي غلطانة!
_ أيوه يعني حضرتك لسه شايف أن انا اللي غلطانة برضوا!
_ ايوه اعمل إيه برضوا!!!
_ اللهم صبر الوحش على الجحش يارب بقولك يا راجل عايزة حقي يعني… محضر سب وقذف على محضر عدم تعرض على محضر آداب وشوية حاجات كده من اللي قلبك يحبهم.
_ شوية حاجات من اللي قلبي يحبهم! أنتِ سليمة يابنتي؟ اقصد بخير يعني؟ أنتِ مش واعية أنتِ فين ولا إيه ؟
_ يوه خلاص خلاص متزعقش ده انت راجل خنقة بصحيح خلاص انا هعمل بأصلي واتنازل عن المحضر ده عشان أنا بنت اصول ومتربية عشر مرات بس!
_ لا والله!
_ ايوه والله كده يا باشا زي ما بقولك يلا سلامو عليكو.
قولتله الكلمتين دول وطلعت بسرعة بره المكتب هو انا ناقصة هم وغم وبلاوي سودة!
مصلحة ولا مروحة
يومي الأسود في القسم
بقلم/ دينا الحمزاوي
المشهد الثالث
المهم وانا ماشية بقى خارجة من القسم فضلت الف في الشوارع شوية كتير لحد ما قابلت صدفة وصدفة وحشة اوي اه والله كده زي ما بقولكم في منطقة خالية من البشر والحيوانات وصوت الرياح والعفاريت وجميع المخلوقات اللي مش موجودة عامةً أحم اعذروني اصل بحب ارغي كتير اصل أنا في طبيعتي واحدة رغاية اوي حتى مرة وانا صغيرة إيه ده ثواني كنت هدخلكم في حوارات تاني مش بقولكم أنا رغاية اوي! يلا بقى مش مهم متاخدوش في بالكم اوي.
المهم يا حبايبي خير اللهم اجعله خير لقيت اتنين كده واقفين بيبصوا حواليهم بريبة قومت أنا بقى مشغلة وضعية المفتش كرومبو واستخبيت بسرعة قبل ما يشوفوني قولت اشوف العيال الواطشية دي بيعملوا إيه ما الفسق والفجور ملى البلد اومال.
يوه رغيت كتير تاني صح؟
يلا مش مهم فدايا كتشر الف خيري…
بيسلموا لبعض إيه ده يا اخواتشي؟؟
هو اللي أنا شيفاه ده صح؟؟ سكر ؟؟؟ بيسلموا لبعض سكر ؟؟؟ ومالهم خايفين اوي كده ليه وعمالين يبصوا حواليهم أما ناس غريبة بصحيح يلا بقى أنا مالي لفيت عشان امشي لقيت واحد فيهم وعشان أنا حظي حلو زي وشي بينور كده نور يا اخواتشي نـــــــور!
قفشني اه والله كده زي ما بقولكم قفشني يخرب بيت حلاوة حظك يابت يا إلهام لقيته بيزعقلي وهو بيقولي :
_ اقفي عندك يابت!
قال على أساس العبيط قال قال إيه يعني أنا هسمع كلامه واقف عندي ليه عبيطة أنا ولا عبيطة؟ ولا اكونش عبيطة؟
خدت ديلي في سناني وطلعت أجري وشغلت وضعية أنجوا بحياتكـــــم .
اه والله كده زي ما بقولكم وانا بقى طالعة بجري زي الصاروخ والجحشين قصدي الاتنين التانيين طالعين يجروا ورايا يوه علينا بقى متعبوش دول ده انا بقالي ربع ساعة بجري ورجلي ورمت من الجري بس اسيبهم يقفشوني؟ والله ابداً كله إلا الخسارة يابيه كله إلا ايه ؟ الخسارة.
المهم وانا طالعة بجري بقى ومش قادرة اوقف الفرامل هتقولولي فرامل إيه يابت ياهبلة انتِ؟
هقولكم فرامل رجلي اكيد يعني مش فرامل العربية هو انا لاقية اكل؟
المهم بقى إيه ؟
مصلحة ولا مروحة
يومي الأسود في القسم
بقلم/ دينا الحمزاوي
المشهد الرابع
وقفت قدامي عربية عند اخر لحظة قبل ما تخبطني واروح في ابو بلاش .
وانا بقى قولت هيه هيصة هينزل دلوقتي من العربية زي ما بقرأ في الروايات واحد طويل وعريض المنكبين ومز اوي اوي وهينقذني منهم ويتجوزني ونعيش في تبات ونبات ونخلف بنات وبنات هتقولولي مش كان اسمها صبيان وبنات ؟ هقولكم دي حقيقة فعلاً بس انا مش بحب الاولاد أنا هخلف بنات كتشير واشردهم في إشارات المرور ايوه انا هشرد ولادي ملكوش دعوة انتوا!
اتفتح باب العربية ونزل منه واحد ايه ده ده رفيع ولابس نظارة! اومال فين عريض المنكبين زعيم المافيـ.ـا القاسي أو ظابط المخبرات الجاحد!! فين الرجالة دي!!!!!
لقيته بيحمحم قدامي وهو بيعدل نظارته بتوتر وبيسالني بقلق :
_ أنتِ كويسة يا آنسة؟
_ هاه!
_ بقولك أنتِ كويسة ؟؟
_ أيوه أيوه زي الفـ…..
وقبل حتى ما اكمل جملتي لقيت الجحشين اللي كانوا بيجروا ورايا وقفوا وهما بيقولوا :
_ أهي هناك.
رجعت لفيت وشي للشاب اللي كان قدامي وابتسمت ليه ببلاهة وانا بقول :
_ شكلي ولا انا ولا انت هنبقى كويسين النهاردة.
وقبل ما يلحق يستفسر مني كانوا الرجالة وقفوا قدامنا وبيقولوله :
_ سيب البت دي ويلا يا عسل من هنا دي تخصنا.
لقيت لفلي كده وهو بيبص عليا من تحت لفوق بعدين بصلهم وهز أكتافه بكل بساطة وهو بيقولهم:
_ اتفضلوها.
قال الكلمتين دول ولف فتح باب العربية وركب أنا فضلت اشتم فيه في سري بعدين بصيت للجحشين اللي قدامي وقولتلهم ببلاهة :
_ طيب سلامو عليكو يا رجالة أنا بقى.
لقيت واحد منهم قرب مني ولسه هيلمسني لقيت اللي مسك ايده الراجل بص وانا بصيت وكوكب الأرض كله بص لقيت الواد اللي ركب العربية وبالمناسبة ممشيش !
كان قالع نضارته والساعة بتاعته هتقولولي عرفتي منين يابت يا إلهام ؟
هقولكم أنا بحب اركز في التفاصيل اوي متاخدوش في بالكم انتم!
لقيته ابتسم الراجل كده وهو بيبصلي وبيقولي:
_ أنتِ لسه هتنحي؟ على العربية يلا
سمعت الكلمتين دول وطلعت أجري على العربية ركبت وقعدت ابص عليه وهو مسك الراجلين ونزل فيهم ضـ ـرب بعدين بعد ما خلص عليهم قرب من باب العربية وفتحه وركب كنت باصة عليه بانبهار شديد وانا اللي افتكرته عيل نوتي!!!
فعلاً مش عشان لابس نظارة ولبس محترم ومهندم كده يبقى جبان ده طلع ولا سوبر مان من الاحلام يا جودعان بصيتله ببلاهة بعدين رقعت زغروطة وانا بقوله :
_ راجلي وربنا راجلي انت مش هتتجوز غيري يالا سامع؟
تمت🤍مصلحة ولا مروحة
ک/ دينا الحمزاوي
متنسوش تقرأوا الأسكريبت السابق بعنوان
أنا وأبنة عمي
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
