بعد أن انهى القراءة، يظهر عليه علامات عدم استيعاب.
سورانديك : شكلك مش فاهم اوى هوضحلك، الحوار بدأ لما فنجان ابن ملك الجان ، عرض فى حفلة أحدث اختراعاته عبارة عن آلات زمن ، ووزير الأنتخابات لقى أن متحف الجان محتاج كنوز أكثر علشان كده وزير الأنتخابات اللى بيحط شروط مسابقة الأنتخابات الملكية بالإتفاق مع الملك طبعا، خلى المسابقة اللى يعرف يجيب اربع كنوز من عوالم الجان القديمة، وكل واحد قدم على الأنتخابات استلم آلة زمن بعد ما احتجينا أن ازاى هننافس من غيرها.
علي : طب متأخدها وترجع بالزمن تجيب الكنوز ؟ وأنا مالى ارجع أنا ليه انتوا جن فى بعض .
سورانديك : مهو أنا جايلك فى الكلام فنجان قال فى حفلة افتتاح الآلات، أن العبور من خلالها لازم لجنى صغير فى السن لا إلا أنس علشان ولو عدى جن مش صغير يتحرق من اشعاعها، وقال انه لسه فى مرحلة تطورها علشان تعدى كل الأعمار.
ثم يكمل بخوف : بصراحة مقدميش وقت كتير، لازم الحق اجيب الكنوز.
علي : وانا مش هقدر أعمل كده وسبنى فى حالى بقى، انت ايه يا أخى معندكش احساس.
سورانديك بغضب : أنا مش هأخد منك رد دلوقتي، فكر ورد عليا.
…………………………………..
ترقد بجانبه على السرير : مالك يا حبيبي، من ساعة ما جيت وانت سرحان.
علي : مفيش يا حبيبتي تعبان شويه.
جنات بلطف : طب مش هنسهر سوا ابنك نام.
يغطي رأسه بالغطاء : بعدين عاوز أنام.
جنات : هو سورانديك قابلك.
علي ينتفض ناهضاً : انتى تعرفيه منين.
جنات : مامتك حكتلى على كل حاجة وعن الآلة هو انا مش مراتك ومن حقى اعرف، وبقالك فترة بتهلوس باسمه وانت نايم، ما تحكيلى يا حبيبي اللى مضايقك جايز اقدر أساعدك.
*بعد فترة من الوقت*
جنات : ويوم الفرح كان جى ليه؟
علي : مقليش، هو دايماً غامض مبيقولش أى حاجة الا فى وقتها، ومش كل حاجة بيقولهالى بيحب دايماً يعيشنى جو الغموض.
جنات بتلعثم : هتروح معاه؟
علي : انا بفكر أغير عنوان بيتى.
جنات : ما احنا نقلنا مرة لما جينا نغير لشقة أكبر، وهو عرف مكانك بردو.
علي بقلة حيلة : طب اعمل ايه يا جنات.
جنات : انا خايفة لما تساعدوا ميسبكش فى حالك؟ وينطلك تانى كل حبة؟
علي : كل حاجة وليها ضريبة يا جنات، اللى أنا فيه ده فعلاً بسببه غير توفيق ربنا طبعاً ، غير ابنى دا فعلاً بقى نقطة ضعفى! حاسس أنه ماسكى المرادي من أكثر ايد بتوجعنى.
جنات : أنا هحكى لمامتك جايز عندها حل.
…………………………………..
داخل غرفة واسعة تحتوى على اريكة فقط دهانها بنى اللون
سورانديك : مش انت كبير السحرة أنا جى استشيرك فى المستقبل، شغل تعاويذك وفهمنى .
الساحر : وانا المستقبل بيقولى ان علي بتاعك ده مش هيعرف يعملك حاجة، والتعويذات مش مبينالى اوى هيعمل ايه فى المهمة الأولى بس لو عدى من المهمة الاولى الباقى مش هيعرف يعديهم .
…………………………………..
*داخل منزل سورانديك *
بهلول : وهتوديه؟
سورانديك : عندك بديل
بهلول : فعلاً الحوار أكبر منه.
سورانديك : يعني ايه؟
بهلول : خدت بالك من الملحوظة دى فى الأعلان؟
سورانديك : آه مالها بتقول ان أى جنى صغير مسمحوله يعدى من الآلة عادي من غير ما يتحرق، وسمعتها فى حفلة فنجان للآلات مهى اتعرضت فى التلفزيون .
بهلول : مكتوب أنه شرط ميكونش عدا سن الرشد، يعنى ممكن مراهق مش لازم طفل! حاجة كده زى سن عيال ثانوى عند الأنس.
سورانديك بعصبية : هيا ناقصة عيال يا بهلول، عاوزنى أعتمد على عيل.
بهلول بذكاء : ومين قالك انه هيروح لوحده؟
سورانديك بدهشة : انت قصدك…….
بهلول : بالظبط يروحوا سوا يبقى مساعد ليه ، صدقنى الحوار أكبر منه لوحده، اسمع كلامى علشان تكسب الانتخابات.
سورانديك : بس انا معرفش عيال من الجان، و برده الساحر قال ان علي مش هينجح؟
بهلول بحماس : بالنسبة للعيال مفيش غيره ومن ساعة معرفته وهو مادى فهيوافق، أما حتة علي هينجح او لا، ممكن نحاول نشوف بديل أثناء ما هما فى المهمات لو فشلوا نبعت البديل، المهم نكسب وقت قبل ما ميعاد حفلة اختيار الملك تجى.
…………………………………..
الأم : اعمله اللى هو عاوزه.
جنات : انتى اللى بتقولى كده، صدقينى مش هيسيبه فى حاله كل مرة لما هيحتاجه هيرجعله.
ماما : فاكر استمارة العقود المسحورة اللى كارما حكتلك عنها قبل كده.
علي بتذكر : ايوه فاكرها اكتب فى العقد البنود اللى عاوزها ولو الجنى أخل بيها يتحرق.
الأم : بالظبط يبقى دى آخر مهمة ليك معاه؟ وتخلص منه علشان كده بقولك اعمله اللى هو عاوزه، ثم تكمل بقلق : وخد بالك من نفسك يا حبيبي.
…………………………………..
داخل منزل سورانديك
سورانديك بتعجب : ايه ده لحقت جبته، لحق عدى النفق لعالم الأنس بالسرعة دى ازاى .
بهلول بتعلثم : اتصلت بيه و بآلة الزمن اللى معاك فتحتله فجوة هناك فى بيته وجبته، وقلت بالمرة أتاكد اذا كان يقدر يعبر منها ولا لا.
سورانديك بعصبية : انت ازاى تستخدمها من غير ما تقولى .
بهلول وهو يشيح بيده : يا عم اسكت بقى ، أنا غلطان يعنى إنى بساعدك ، متنساش كل ده مقابل انك هتخلينى وزير زى ما وعدتنى.
سورانديك بإبتسامة مزيفة : طبعا، أنا عند وعدى.
بهلول : يبقى أعرفك، ادخل يا كرنجشوه.
يدخل (جني وسيم ، بشوش الوجه، متوسط الطول، يضع علي وجهه مساحيق تجعل بشرته بيضاء، يرتدى ملابس راقية، يغلب عليه الطابع الكوميدى، مستهتر قليلاً يخلق من مأساته ضحكة ومن مُشكلاته نكتـة )
سورانديك بإعجاب : الله دا ابيض ازاى ده مش المفروض إنك أسمر زينا، دا انت مبدع مكياج مش باين انه مكياج خالص.
كرنجشوه : اصل بحب الرسم، واللعب بالمكياج هوايتى.
بهلول : ها ايه رأيك فيه ، دا شاطر أوى ويفوت فى الحديد لو عاوز ، وانا عرفته المهمة المطلوبة منه.
سورانديك : والمقابل.
كرنجشوه : ١٠٬٠٠٠ جنية دهب .
سورانديك بخضة : بتقول كام؟
كرنجشوه وهو يهم بالمغادرة : بلاش سلام عليكم.
بهلول : اهدا بس يا كرنجشوه، جرا ايه يا سورانديك دا هيساعدك تبقى ملك الجان بجلالة قدره ، حاول تتصرفله فى المبلغ .
كرنجشوه : وعاوز نصهم مقدم.
يصمت سورانديك قليلاً : أنا موافق بس بشرط ، نمضى استمارة عقد مسحور بالبنود اللى انا اختارها.
……..
جنات : ايه حكاية العقود المسحورة دى؟