رواية عاصفة القلوب
عاصفة القلوب
رواية عاصفة القلوب: صباح مختلف تمامًا
صحيت ملك الصبح بنشاط غير العادة
وكأن النوم شال جزء من الهم اللي على صدرها دخلت على الصالة بابتسامة هادية
صباح الخير يابابا فين ماما؟
يسعدلي صباحك قلب بابا
قبل ما يكملوا سمعوا صوت جاي من وراهم
صباح الخير ياعبدالرؤوف فين..؟!
وقطعت كلامها أول ما شافت بنتها
الابتسامة كانت منورة وجه ملك بشكل مفاجئ
صباح الخير ملوكه
صباحك حلو ياحلوة قوليلي ياكوكي
لكن أمها قطعت الجملة بحدّة مصطنعة
كوكي إيه يا ملك؟! يا قليلة الأدب!
ضحك الأب على مناغشتهم
سبيها يا كريمة تدلعك، ما إحنا بنقولك ياكوكي من زمان فطروا كلهم في جو هادي صوت المعالق على الأطباق كأنه موسيقى مطمئنة وكريمه من وقت للتاني تبص على بنتها بقلق محبوس خلصوا الفطار وقفت ملك وهي بتلبس شنطتها مستأذنة عندي ميعاد مع الدكتور أسر في العيادة
كريمه اتنهدت
ربنا يريح قلبك يا بنت عمري كله
ملك ابتسمت ابتسامة صغيرة بس جواها كان في مزيج من الأمل والخوف لسه عاصفة أسر الحقيقية ما بدأتش والنهارده أول خطوة ليها في مواجهتها.
رواية عاصفة القلوب: بيت مليان حياة
على عكس بيت ملك اللي كان كله هدوء بيت أسر كان ناشط من الفجر ضحك؛ جري؛ وصوت خطوات صغيرة بتتنطط في كل حتة أسر نازل على سلم الفيلا. وشكله بينام ويفوق في نفس اللحظة
يلا يا أنس يلا يا سيلا باص المدرسة هيفوّتكم
صوته كان عالي بس فيه حنية بتضحك
نزلوا التوأم جري. سيلا بتزق أنس وبتقول له
أنا هسبقك
وأنس بيرد عليها وهو بيجري
هو أنا هشيلك ولا إيه؟
خدوا سندوتشاتهم بسرعة وباسوا إيد أمهم عفاف اللي كانت واقفة في المطبخ تقول
ربنا يحفظكم يا قلوب ماما
وباس إيد أبوه عبدالله اللي رد عليه بابتسامة فخر صغيرة
ربنا يوفقك يا أسر
طلع أسر من البيت شال فونه ومفاتيحه وركب عربيته وهو ماسك نفسه من الزحمة اللي لسه ما بدأتش
أول ما وصل قدام العيادة وقف لحظة وبص على اليافطة اللي قدام الباب
اسم العيادة الدكتور أسر عبدالله استشاري العلاج النفسي والسلوكي ابتسم ابتسامة فيها تعب سنين ومجهود كبير واتمنى يشوف اسمه يوم على يوم بين أكبر الدكاترة النفسية مش عشان شهرة لكن عشان يعرف إنه نجح في علاج الناس زي ما عالج روحه زمان.
رواية عاصفة القلوب : بداية الانفجار الهادئ
دخلت الممرضة شيرين ملف ملك وهو منتظرها قلبه اتشد من مجرد اسمها سبب مجهول بيخليه يفحص التفاصيل أكتر من اللازم وبعد دقايق هادية وصلت ملك ودخلت بخفة وصوتها منخفض
السلام عليكم ورحمة الله وبركاته يا دكتور
وعليكم السلام…
بصلها بعيون فيها جزء مهني وجزء تاني بيحاول يفهم اللي بينها وبين التعب
إزيّك النهاردة يا ملك؟ يا رب تكوني بخير
قعدت ملك قدامه وتنهيدة طويلة خرجت من صدرها كأنها كانت حابسة نفسها من امبارح
اتكلم أسر بثقة هادية
قولي يا ملك بدون مكياج للكلام بلاش تجمّليه
ملك نزلت عينيها وبصوت ضعيف بيرتعش من جوا
الكلام لو طلع بالغصب هيكون مشوّه وأنا عايزة أتكلم عشان أرتاح مش عشان حد بيشدّ مني الكلام أسر سكت لحظة فهم الرسالة فهم إن جواها كلام مش محتاج طبيب قد ما محتاج مساحة
طب قوليلي يا ملك مشكلتك زي ما هي بدون شد ولا غصب ولا خوف
تنفست ملك بعمق وبعدين قالت بصوت بيكسر حتت منها
أنا كنت بحب
وسكتت كأن الجملة اللي بعدها خافت تطلع ولا هي نفسها واثقة إنها حبّت ولا لأ
رفع أسر عينه عنها شاف وجع مش بيكذب ولا بيبالغ
ملك همست
كنت بحب بس يمكن اللي كنت فاكرة حب كان حاجة تانية خالص كان تمسّك؛ كان خوفي؛ كان أنا اللي حطّيته في مكان أكبر من اللي يستحقه
وصمتت ملك والغرفة اتملت بصوت النفس
بس أسر حسّ إنها بدأت الخطوة الأولى في رحلة العلاج
وإن الجلسة دي مش زي أي جلسة قبلها.
رواية عاصفة القلوب: اعتراف يوجع الروح
كملت بعد صمت دام دقايق كانت بتحارب نفسها عشان تكمل وصوتها وهي بتتكلم كان شبه الهمس بس كل كلمة فيها وجع صريح
كان المفروض نرتبط بشكل رسمي بس اكتشفت إنه كان شايفني بنت غير أي بنت حاول يكلمها قبل كده
صدّته؛ دخل لي من باب الاهتمام كان حواليا طول اليوم بشكل مبالغ فيه غصب عني اتشدّيت له
وفي الوقت اللي كنت قافلة فيه باب قلبي نهائي اتفتح
وبمجرد ما فتحته خاني
كملت كلامها بوجع محسوس، وجع واضح على ملامحها قبل صوتها
خاني يعني أنا اشتريته في وقت كنت ببيع أي حد وهو باعني في وقت كنت خلاص حبيته بحبه بقلبي كله محلتوش غيره خاني؛ ولما واجهته منكرش بس قال سبب وجعني أكتر قال إنّي مش مهتمية بحبه هو فاكر إن الحب عرض وطلب الحب مش كده الحب مشاعر متبادلة مش مساومة والخيانه جت لما حسّيت إنه بيبدي أي شي عني أنا آخر اهتماماته ولما اتمكن من حبي أهملني وقالي بكل بجاحة إنه كان راهن نفسه يخليني أحبه وبعد كده يبعد عشان رفضته من البداية يعني كان انتقام مش حب ولا حتى إعجاب ولا أي شيء له علاقة بالمشاعر
ملك لما خلصت آخر كلمة كانت شبه منهارة بس ماسكة نفسها بإيدين الاثنين وبتحاول تطلّع وجع عالق جواها من شهور وأسر كان ساكت مش لأنه مش لاقي كلام لأ لأنه عارف إن في لحظات الإنصات فيها علاج أكتر من الكلام.
رواية عاصفة القلوب: حين يداوي الطبيب بالكلام
أسر سحب نفس هادي وبصّ لملك نظرة مش طبيب نظرة إنسان فهم معنى الشرخ اللي جواها
واتكلم بصوت واطي بس ثابت كلامه كان زي ضمادة على جرح لسه بينزف
العلاقات اللي ماشيه بالزق والمناهدة وقلة الحيلة
كان لازم ييجي يوم وتخلص؛ العلاقة اللي الحلو فيها بييجي متأخر مبيبقاش ليه طعم
ردود الأفعال اللي بنستناها ومنلاقيهاش
الردود المقتضبة؛ الإهتمام اللي بيتسحب والكلمة اللي بتيجي ناقصة ومليانة برد
العلاقة من النوع ده مبتكسرش الروح هي بتدشدشها
بتخلي الروح زي إزاز اتضغط عليه لحد ما بقى رمل
الحاجات اللي مش بتجري ورانا بنفس القدر اللي إحنا بنجري بيه وراها والمشاعر اللي بنقدمها بإيدينا
وبتترد لينا بمنتهى الجفاف
الـ “وحشتني” اللي بتتقال مجاملة بس عشان انتِ قولتي الأول فتترد في وشك بوجع؛ وجع بيسيب عاهة نفسية مستديمة؛ كسر النفس بعد الصدمات والحرية الناقصة
والتراكمات اللي متكومة زي طبقات تراب على الروح
الكلمة اللي تجمع كل ده ومبتتقالش السند؛ الاحتواء؛ فكرة إن يكون حد كفاية
ردود الفعل المصمتة وكسر الحواجز والخروج من الدواير المقفولة والكدب اللي بيهري البني آدم من جوه
الخروج عن القطيع والورطة والعقدة والزنقة وعدم وجود مخرج من دايرة فاضية بتهلك
التأخير المصيري اللي بيدشدش الروح والعلاقة اللي من النوع ده لازم؛ لازم ييجي وقت وتخلص لوحدها
ملعون أبو العلاقة اللي فيها خوف وقلق وكوابيس والحلو فيها بيتكسر والشغف بيقل والضحكة بتضيع وتبقى دايمًا كدابة والليالي تطول والناس تخدع وكل حاجة فيها بتسيء استخدام الحلو اللي جوانا
سكت أسر بعد آخر كلمة كأنه هو كمان فاهم شكل الجرح ده فاهم ألم العلاقة اللي بتسرق الروح على مهل ملك بصت له وعينيها لأول مرة كان فيها نفس؛ نفس طالع من تحت حمل تقيل وكان واضح إن جملة منه رجّعت لها حتة من نفسها اللي اتكسرت.
رواية عاصفة القلوب: ضحكة بتفتح باب الشفاء
بصّت ملك ليه بنظرة ممتنّة مش مجرد شكر لا ده امتنان لإن حد أخيرًا نطق اللي كان جوّاها ومخنوق بقاله شهور
اتكلمت بصوت هادي
انت لخصت كلام كتير جوايا أنا حتى كنت بحاول أنساه
أسر ما حولش يخفّف بصّ لها بثبات نظرة طبيب وعين إنسان في نفس الوقت كأنه بيدوّر على الحقيقة بين كلماتها
متحاوليش تنسي لأن المحاولة نفسها تفكير
ملك حطّت إيديها على عنيها بتكتم الضحكة المتوترة اللي سرقت أول مرة من وجع قلبها
يعني أعمل إيه؟
ضحك أسر ضحكة خفيفة وبصلها بجدية نصها هزار ونصها فهم وجاب جملة كسرت التوتر كله
أصل التفكير في عدم التفكير محتاج تفكير
اتحولت الضحكة لكركبة جميلة ضحكوا سوا ضحكة نظيفة زي أول نفس بعد غرق طويل
وبعد ما سكنت الضحكة فضلت على وشهم ابتسامة صافية
واستغل أسر اللحظة دي وقال:
صدقيني محاولة النسيان حاجة صعبة جربي التخطي
التخطي يعني تفتكري بس من غير ما تتأثري من غير ما توقفي حياتك؛ لكن النسيان؟ أقل موقف هيفكرك والجرح هيصحى من تاني وهتفضلي تبكي على الأطلال اللي متستهلش دمعة التخطي هو إن الذكرى تفضل؛ بس الوجع يمشي.
اتكلمت ملك باستسلام هادي
يمكن؛ يمكن معاك حق
سكت أسر شوية نظرة طويلة كأنه بيقيس المسافة بين كلامها وقلبها وبعدين اتكلم بصوت هادي؛ ثابت؛ يوصل لعمق الروح
الشخص لما يقرر يتخلّص من التراكمات ويقول خلاص أنا هبتدي صفحة جديدة الدنيا مبتسهلّش الموضوع
بتعمل معاه بالظبط زي اللي يكون كاتب بقلم حبر على ورقة ولما ييجي يقلب الصفحة عشان يبدأ من الأول
يلاقي بواقي الحبر مطبوعة ع الصفحة اللي بعدها
ساعتها لو فعلاً ناوي على صفحة جديدة لازم يصبــر
لحد ما آثار الحبر تختفي لحد ما الورقة تبقى صافية وجديدة بجد كل حاجة بتسيب أثر الألم؛ الخذلان؛ الكلام اللي اتقال واللي متقلش والناس اللي دخلوا ومشيوا الأثر مش بيروح بسهولة مش بكلمة ولا بمحاولة نسيان مستعجلة بس الواحد لو ناوي يبدأ على راحة حقيقية لازم يتعب شوية لازم يشيل اللي باقي جواه
وعلى قد ما يتعب على قد ما يحس بقيمة الراحة
وقيمة نفسه؛ وقيمة إن قلبه بقى خفيف بعد ما كان مليان
ملك كانت قاعدة قدامه ساكتة بس عينيها لوحدها قالت
إن الكلام لمس مكان موجوع…
مكان كان محتاج حد يفهمه بالشكل ده.
يُتبع..!
للكاتبة صباح البغدادي (صبا)
اقرا قصة عاصفة القلوب الفصل الثاني من هنا
اكتشاف المزيد من عوالم من الخيال
اشترك للحصول على أحدث التدوينات المرسلة إلى بريدك الإلكتروني.
حلو وجميل❤️
استمري أنا معك
يخليلي ❤❤❤❤❤